Qyzylorda oblysynda kúzgi egin jınaý naýqany qalaı júrip jatyr

QYZYLORDA. QazAqparat - Qyzylorda oblysynda kúzgi egin jınaý josparly oryndalýda, dep habarlaıdy QazAqparat tilshisi.

Bıyl óńirde 188,1 myń gektar jerge aýyl sharýashylyǵy daqyldary ornalastyryldy. Kúrish kólemi 83,6 myń gektardy qurady. Sondaı-aq, sý tapshylyǵyna baılanysty kúrish alqaby ótken jylmen salystyrǵanda 5,9 myń gektarǵa deıin azaıtyldy. Onyń ornyna sýdy az qajet etetin kartop, kókónis, baqsha daqyldary egildi. Olardyń kólemi ótken jylmen salystyrǵanda 9,8 myń gektarǵa deıin artqan.
«Kúzgi egin jınaý naýqany josparly júrgizilýde. Qazirgi tańda, oblysta kúrishten basqa dándik daqyldardy (kúzdik bıdaı, jazdyq bıdaı, arpa, suly, dán júgeri) jáne maıly daqyldardan maqsary men soıany, kartop, kókónis, baqsha, daqyldaryn jınaý jumystary tolyǵymen aıaqtaldy. Bul salany qoldaýǵa osy jyly barlyǵy 4,1 mlrd teńge memleketten qarjy bólindi. 40,3 myń gektar jerge egilgen jońyshqadan 228,4 myń tonna eski jońyshqa, 17,8 myń tonna jańa jońyshqa ónim jınalyndy. Súrlemdik júgeriden 7,1 myń tonna ónim alynsa, mal azyqtyq asqabaq tolyq jınalyp 1,5 myń tonna ónim alyndy. Súrlem daıyndaý jumystary áli de jalǵasýda», - dedi oblystyq aýyl sharýashylyǵy basqarmasynyń basshysy Talǵat Dúısebaev.
Aımaqta kúrishke oraq salý jumystary 26 tamyzdan bastaldy. Búgingi kúni kúrishtiń 78103 gektaryna (93,5%) oraq salynyp, onyń 70344 gektary (90,1%) bastyryldy. Ár gektarynan ortasha 55,8 tsentnerden ónim alynýda. Kúzgi egin jınaý naýqanyn 10 qazannan keshiktirmeı aıaqtaý josparlanýda.
Eske salsaq, Aral aýdanynda qysqa jem-shóp daıyndaý qarqyndy júrýde.