Qyzylorda oblysynda kúrishtiń tez pisetin túrleri ósirilýi múmkin
ASTANA. QazAqparat -Bıyl qarmaqshylyq dıqandar 24 myń gektar egis ekti. Onyń 14 myń gektary kúrish, dep habarlaıdy Habar 24.
Ónimi oıdan shyqqan aýyldardyń biri - Dúr Ońǵar. Mundaǵy mamandar tuqym sapasyna erekshe mán bergen.
«Aýa raıymyzǵa, osy oblysymyzdyń klımatyna yńǵaıly 90 kúnde pisedi, soǵan yńǵaılap osy kúrishti egip jatyrmyz. Qazir kóbine sharýashylyǵymyzda osy «Lıder» kúrishin egemiz», - deıdi sharýashylyq brıgadıri Danııar Qulmaǵanbetov.
Jańa tuqym túrlerin Ybyraı Jaqaev atyndaǵy Qazaq kúrish zertteý ınstıtýty da synaqtan ótkizýde. Sonyń ishinde otandyqtan bólek ırandyq 4 suryp bar.
«Kúrishtiń tez pisetin suryptaryn engizýge tıistimiz. Qazir endi oǵan baılanysty ınstıtýt óz tarapynan jańa surypty shyǵaryp jatyr. Endi bıylǵy jyly synaqtan ótkizsek, kelesi jyly óndiriske engizemiz. «Syr sulýy», «Áıgerim» degen suryptar bolashaǵy bar suryptar bolyp esepteledi. Odan bólek Irannyń «Tórem Hoshemı» surpyn kólemin kóbeıttik. Kelisin 900 teńgeden ótkizý máselesi qolǵa alyndy. Osyǵan baılanysty osy surypty kóbeıtip, ári qaraı naryǵyn tabamyz ba dep oılap jatyrmyz»,- dep atap ótti oblystyq aýyl sharýashylyǵy basqarmasynyń basshysy Baqyt Jahanov.
Tuqym jetkilikti bolǵanymen, tirshilik nárinen tapshylyq týsa, eńbek esh ketedi. Bıyl oblystyń Jańaqorǵan jáne Qazaly aýdandary úshin aq marjandy kútip-baptaý qıynǵa soqty. Onyń basty sebebi Syrdarııanyń deńgeıi tómendep, sý jetpeı qaldy. Aýa raıy da qolaısyzdyq tanytty. «Sondyqtan sýdy únemdeý úshin ǵylymı turǵyda dáleldengen jańa tehnologııalardy egin sharýashylyǵyna engizý ýaqyt talaby», - deıdi mamandar.
«Akvasarment degen qospa bar. Bıyl osy qospalardy qossa, kóktemde azdy-kópti jańbyr bolsa, sol jerdiń ylǵaldylyǵyn saqtap qalatyndaı sondaı múmkinshilik bar. Bizdiń Qyzylorda oblysynyń barlyq jerine emes, Qarataýdyń bókterinde, Shıeli aýdanynda, ásirese mal azyǵyn sýarýsyz jaǵdaıda egip kórýge bolady. Biz sol baǵytta sony qolǵa alamyz dep jumys jasap jatyrmyz» - dedi oblys ákiminiń orynbasary Serik Qojanııazov.
Degenmen sý tapshylyǵyn boldyrmaýdyń birden-bir joly Shıeli aýdanynan «Kúmisketken» sý qoımasyn salyp, Qaraózek arnasyndaǵy toǵannyń qurylysyn jedel bastaý qajet. Onyń tehnıka ekonomıkalyq negizdemesin jasaýǵa oblystyq bıýdjetten qarji bólinip te qoıylǵan. Qos joba júzege assa, 2 mlrd tekshe metrden astam sýdy osy arnalarda jınap qalýǵa bolady. Mamandar Syr óńirinde sýarmaly sýdy únemdeý jáne tıimdi paıdalaný boıynsha tolyq sharalar keshenin engizý qajet ekenin aıtady.
