Qyzylorda oblysynda kúrishke oraq tústi
QYZYLORDA. QazAqparat - Qyzylorda oblysynda kúrishke oraq tústi, dep habarlaıdy QazAqparat tilshisi.
Bıyl eginge oraq salý sharasy Jalaǵash aýdanynda boldy. Oǵan oblys ákimi Gúlshara Ábdiqalyqova, QR Parlamenti Senatynyń depýtattary Murat Baqtııaruly men Aqmaral Álnazarova, Májilis depýtaty Balaıym Kesebaeva jáne sharýashylyq basshylary qatysty.
Oblys ákimi Syr dıqandarynyń eńbegin erekshe atap ótip, aqjarma tilegin bildirdi.
«Bıyl El Táýelsizdiginiń 30 jyldyq merekesi ataqty dıqan, dala akademıgi, aq kúrishtiń atasy Ybyraı Jaqaevtyń 130 jyldyq mereıtoıymen qatar kelip otyr. Sondyqtan bıyl jınalatyn el astyǵyna oblys eginshileri barynsha úles qosady dep senemin.
El nesibesin tókpeı-shashpaı jınap alýymyz qajet», - dedi oblys ákimi.
Sondaı-aq, ıgi shara barysynda oblys ákimi «Tań LTD» seriktestiginiń júgeri daqyly egilgen egis alqabyna baryp, aýyl sharýashylyǵy salasyndaǵy ártaraptandyrý baǵytynda mamandarmen pikir almasty.
Bıyl óńirde aýyl sharýashylyǵy daqyldary 188,1 myń gektar jerge ornalastyryldy. Al, negizgi daqyl - kúrishtiń kólemi 83,6 myń gektar. Sý tapshylyǵyna baılanysty kúrish kólemi ótken jylmen salystyrǵanda 5,9 myń gektarǵa deıin azaıyp, onyń ornyna sýdy az qajet etetin mal azyqtyq jáne maıly daqyldarmen qatar kartop, kókónis, baqsha daqyldary egildi.
Egis kólemi ótken jylmen salystyrǵanda 9,8 myń gektarǵa deıin artyp, jalpy egis sáıkesinshe 3,9 myń gektarǵa ulǵaıdy.
Egilgen kúrishten joǵary ónim alý maqsatynda kúrishtikke tolyqtaı joǵary reprodýktsııaly tuqymdar sebildi. Al 71,9 myń gektar egis tyńaıtqyshtarmen qorektendirilse, 69,2 myń gektary aram shópterge qarsy óńdeldi.
Qazir oblysta bıdaı, arpa, suly daqyldaryn jınaý aıaqtalsa, maqsary kartop, kókónis, baqsha, júgeri daqyldaryn jınaý jumystary jalǵasýda. Budan bólek, eski jońyshqa daqylynyń ekinshi orymy men jańa jońyshqany jınaý jumystary júrip jatyr.
Aldaǵy egin jınaý naýqany kezeńinde aýa-raıy boljamy qolaıly bolady dep boljanyp otyr. Osyǵan sáıkes oblysta egin jınaý naýqanyn 10 qazanda aıaqtaý josparlanýda.
Jalaǵash aýdanyna jumys saparymen barǵan aımaq basshysy Tań aýyldyq okrýgindegi atqarylǵan jobalarmen de tanysty. Onyń biri – et óńdeý tsehy. 2019 jyldan beri jumys istep kele jatqan shaǵyn óndiris ornynda múıizdi iri qara soıylady. Tsehtyń jumysyn kórgen óńir basshysy ónimniń qaýipsizdigi men sapasyna nazar aýdarýdy tapsyrdy.
