Qyzylorda oblysynda kúrish oraǵy bastaldy
Atalǵan saltanatty shara Shıeli aýdanyna qarasty «Aqmaıa» sharýa qojalyǵynyń egis alqabynda boldy. Onda aımaqtaǵy birqatar iri sharýashylyq qurylymdarynyń ókilderi arnaıy keldi. Oǵan kelýshiler oblystyń aýyl sharýashylyǵy salasyndaǵy damý kórsetkishteri jáne «Y.Jaqaev atyndaǵy kúrish ǵylymı-zertteý ınstıtýty» JShS-niń ǵylymı jetistikterimen tanysty.
Bıyl aımaqta barlyǵy 184,2 myń gektar jerge aýyl sharýashylyǵy daqyldary ornalastyryldy. Egis kólemi 2019 jylmen salystyrǵanda 1,1 myń gektarǵa artyp otyr. Negizgi daqyl kúrishtiń kólemi 89,5 myń gektardy quraıdy. Egin sharýashylyǵyn ártaraptandyrý baǵytynda oblysta alǵash ret perspektıvaly daqyldar - qant qumaıy 70, soıa 240, júgeri daqyly 1 667 gektarǵa deıin jetkizildi. Al ylǵal saqtaǵysh akvagelderdi paıdalaný arqyly bogarly jerlerge 80 gektar kúzdik bıdaı daqyly egildi. Qazir bıdaı, arpa, suly daqyldaryn jınaý aıaqtaldy. Maqsary kartop, kókónis, baqsha, júgeri daqyldaryn jınaý jumystary jalǵasýda. Olardyń ortasha ónimdiligi ótken jylmen salystyrǵanda birshama joǵary.
Bıyl mamandar kúrishtiń ár gektarynan jınalatyn ortasha ónim 50-55 tsentner aralyǵynda bolady dep boljaıdy. Qazir kúrish tanaptarynan sý tartý sharalary atqarylýda. Bekitilgen kestege sáıkes 36 myń gektar nemese jalpy kúrish egisiniń 40,3 paıyzynyń sýy tartyldy. Eńbekshiler qazan aıynyń ortasyna deıin kúrish oraǵyn aıaqtaýdy josparlap otyr.
Saltanatty sharaǵa arnaıy kelgen oblys ákimi Gúlshara Ábdiqalyqova sý tapshylyǵyn aldyn alý maqsatynda egin túrlerin ártaraptandyrý qajet ekenin atap ótti.
«Bıyl sýarmaly sýdyń tapshylyǵy baıqaldy. Bul egin sharýashylyǵynda ártaraptandyrýdy shyndap iske asyrý qajettiligin aıqyndap otyr. Osyǵan qaraı, aldaǵy jyldary aýyspaly egis júıesindegi kúrish egisiniń kólemin 75-80 myń gektarǵa turaqtandyryp, mal azyqtyq daqyldar egisiniń kólemine basymdyq berilýi tıis», – dedi oblys ákimi.
Óńir basshysy jıyn barysynda sala eńbekkerlerimen kezdesip, aýyl sharýashylyǵy salasyndaǵy jetistikteri úshin alǵys bildirdi.
Sondaı-aq, Qyzylordanyń balyq ónimi Eýropaǵa eksporttalady.