Qyzylorda oblysynda kúrish alańyn qysqartý kórsetkishi oryndalmady - Saparhan Omarov
NUR-SULTAN. QazAqparat – Búgin Úkimet otyrysynda QR Aýyl sharýashylyǵy mınıstri Saparhan Omarov egis alańdaryn ártaraptandyrý boıynsha jospardy oryndamaǵan óńirlerdi atady, dep habarlaıdy QazAqparat tilshisi.
«Egis alańdaryn ártaraptandyrý jumystaryn mınıstrlik turaqty negizde úılestiretin bolady, sondyqtan ákimdikter osy baǵyttaǵy jumysty jandandyrýlary qajet. Bul rette, Qyzylorda oblysynda kúrish alańyn qysqartý jónindegi kórsetkish oryndalmaǵanyn atap ótken jón. Máselen, memorandýmǵa sáıkes Qyzylorda oblysynda 2020 jyly 75 myń gektardy quraýy tıis edi, alaıda naqty egis alańy
89 myń gektardy qurady. ıAǵnı ındıkatıvtik kórsetkishterdiń jyl saıynǵy artýy 14 myń gektardan asady. Osyǵan uqsas jaǵdaı Almaty men Túrkistan oblystarynda da oryn alýda, olarda kórsetkishten artyǵy tıisinshe 500 gektardy jáne 2,3 myń gektardy quraıdy», - dedi mınıstr.
Sonymen qatar, Túrkistan oblysynda da maqta alańdaryn qysqartý boıynsha kórsetkish oryndalmaǵan. Máselen, bıylǵy maqtanyń naqty kólemi memorandýmda kózdelgen alańnan 16 myń gektarǵa artyq boldy. Budan basqa, Qyzylorda jáne Túrkistan oblystarynda bıdaı alańyn qysqartý boıynsha kórsetkish oryndalmaǵany anyqtaldy. 2020 jyly Qyzylorda oblysynda bıdaı egiletin alań Memorandýmda kózdelgennen eki ese asyp tústi.
Túrkistan oblysy boıynsha da osyǵan uqsas jaǵdaı oryn aldy, onda jyl saıyn naqty alań memorandýmnyń ındıkatıvti kórsetkishterinen asady.
«Bul jerde Almaty oblysynyń kórsetkishi úlgi bola alady, onda bıdaıdyń alańy 11 myń gektarǵa tómendegen, osylaısha memorandýmnyń ındıkatıvti kórsetkishteri oryndalǵan», - dedi S. Omarov.
