Qyzylorda oblysynda qoı baǵyp júrgen azamat kanalǵa batyp ketti

QYZYLORDA. QazAqparat - Qyzylorda oblysy Aral aýdanynda qoı baǵyp júrgen 44 jastaǵy azamat kanalǵa sýǵa ketip qaza boldy, dep habarlaıdy QazAqparat tilshisi.

Tótenshe jaǵdaılar qyzmetine 25 shildede saǵat 17:28-de Aral aýdany, Jańaqurylys aýylynda turatyn azamattyń sýǵa ketkeni jóninde habarlama kelip tústi.

«1979 jylǵy azamat qoı baǵyp júrip, «Jarma» sýarmaly kanalyna sýǵa túsip, batyp ketken. Aýyl turǵyndarynyń kómegimen jansyz denesi tabylyp, sýdan shyǵaryldy», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetinen.

Vedomstvo málimetinshe, jyl basynan beri oblysta 22 adam sýǵa ketse, onyń 6-y bala.

Mamandar turǵyndardan barlyq qaýipsizdik sharalaryna nazar aýdarýyn suraıdy.

Eske salsaq, budan buryn Qyzylorda oblysynda 20 jastaǵy malshy tórt kúnnen beri habarsyz ketti.