Qyzylorda oblysynda qos ónerdiń tizginin teń ustaǵan sheber turady
QYZYLORDA. QazAqparat - Syr óńiri qashannan óner ıelerine kende bolmaǵan. Qazaqstan Sýretshiler jáne Qolónershiler odaqtarynyń múshesi Ulmeken Maýytova qos ónerdi tel emgen ónerli jandardyń biri.
Munaıshylar otbasynan shyqqan Ulmeken toǵyz balanyń úshinshisi. Munaıly ólke - Atyraýda dúnıege kelgen ol onjyldyqty bitirgen soń Almatydaǵy Gogol atyndaǵy kórkemsýret ýchılışesin (1979-1982 jyldary) teatr-dekoraty mamandyǵy boıynsha bitiredi. Arada eki jyl ótkende dám-tuzy jarasyp, Qaırat esimdi jigitke turmysqa shyǵady.
Syrǵa kelin atanǵan Ulmeken Jańaqorǵan aýdanynda Álshekeı atyndaǵy óner mektebinde beıneleý ónerinen sabaq beredi.
«Ónerge shyn bet buryp, shyǵarmashylyqpen 2000-shy jyldan beri aınalysyp kelemin. Estetıkalyq talǵam, jan dúnıeńdegi sulýlyqqa degen qumarlyq meni báribir de qylqalam ustaýyma májbúr etti. Qandaı bir týyndyny jasaý ústinde shyǵarmashylyq adamy shabyt qushaǵynda bolady. Óner adamdary muny jaqsy túsinedi. Ondaıda senen asqan baqytty jan bolmaıdy», - deıdi Ulmeken.
Keskindeme janrymen aınalysatyn Ulmekenniń aýdandyq murajaı basshysy Nabıhan Shalapovtyń demeýshiligimen birneshe ret oblystyq kórmesi ótedi. 2011 jyly Qazaqstan Sýretshiler Odaǵyna múshelikke qabyldansa, araǵa tórt jyl salyp Qazaqstan Qolónershiler Odaǵyna múshelikke qabyldandy. Ol shyǵarmalaryn, ıakı týyndylaryn kestemen tigip, jergilikti qoıdyń júninen basyp shyǵarady. Birikken Ulttar Uıymynyń Damý Baǵdarlamasynyń qoldaýymen birneshe mərte Qyzylorda, Astana, Jambyl, Almaty, Bishkek qalalarynda joǵary dərejeli sheberlerdiń sheberlik synyptaryna qatysyp, təjirıbe almassa, Aral, Astana qalasynda sheberlik sabaqtaryn da ótkizgen.
Sýretshiniń esimi men eńbekteri «Qyzylorda oblysynyń Qolóner jáne qylqalam sheberleri» kitabyna da engen. Ulttyq kolorıttegi kıiz buıymdary arqyly talaı konkýrstarda júldeli oryndarǵa ıe boldy. Munan ózge de respýblıkalyq kórme-jármeńkelerde úzdik dep tanylyp keledi. Ótken jyly BUU-nyń Qazaqstandaǵy ofısi «Mýza baǵynda», «Jaratylys», «Qorqyt baba», «Mıras» dep atalatyn kesteli kartınalarymdy satyp aldy.
«Byltyrǵy jyldyń shilde-tamyz aıynda Qyzylorda oblysynyń sheberleri jınalyp, Qarmaqshyda Qorqyt baba kesheninde, EKSPO-ǵa baılanysty ashylǵan etnoaýylda bir aı kórme jasap, Qazaqstannyń túkpir-túkpirinen jəne sheteldik qonaqtarǵa sheberlik synybyn kórsettik. Bul naǵyz este qalatyn oqıǵa», - deıdi qos ónerdiń tizginin tartqan Ulmeken.
Búginde joldasy Qaırat ekeýi eki ul, eki qyz tárbıelep otyr. Úlken uly Almat anasynyń jolyn qýǵan sýretshi bolsa, kenjeleri Nursamal Qyzylordadaǵy Qazanǵap atyndaǵy mýzykalyq kolledjiniń qobyz klasynda oqıdy.
