Qyzylorda oblysynda koronavırýspen 3 myńǵa jýyq medıtsına mamany kúresýde – Ábdiqalyqova
Aımaq basshysy álemdi jaılaǵan koronavırýs óńirdiń túkpir-túkpirine taralyp úlgergenine nazar aýdardy. Qazir oblys boıynsha 116 adam qaterli indettiń quryǵyna ilikken.
«Buǵan problemanyń shyn máninde alapat ekenin áli de bolsa túsine almaýymyz sebep. Onyń qanshama adam ómirin jalmap jatqanyn estisek te, kórsek te, tıisti mán bermeımiz. Іndetten qorǵanbaımyz. Tek saqtansań ǵana saqtaıtynyn esten shyǵarǵandaımyz. Mine, osyndaı kózqaras sanamyzda turaqtap qalǵan. Qazir kóshede júrgen adam da, kólik te kóp. Tártip birkelki oryndalyp jatqan joq. Keı mekemelerdiń, dúkenderdiń, dárihanalardyń aldy adam aıaǵynan arylmaıdy. Tosqaýyl beketteri she? San túrli aıla-tásilderdi oılap taýyp, aınalyp ótpek bolǵandar da bar. Taıaýda karantınge qaramaı, ań-balyqqa shyǵýdyń arty apatqa ulasqanyn da kórip-bildińizder. Oılanaıyq! Koronavırýstyń sońy ólimge ákep soǵýy ábden múmkin. Osy kúnniń ózinde, 10 otandasymyz qaýipti keselden kóz jumdy», - dep atap kórsetti.
Sondaı-aq, oblys basshysy oblysta turǵyndardyń qaýipsizdigi úshin qatań sharalar qabyldanyp jatqanyn, biraq ereje oryndalmasa, tártip saqtalmasa, jumys esh nátıje bermeıtinin qadap aıtty.
«Aımaq boıynsha bul vırýspen kúreske medıtsına salasynyń 3 myńǵa jýyq qyzmetkeri jumyldyryldy. Tosqaýyl beketterinde 200 polıtseı men 170 áskerı qyzmetker úzdiksiz kezekshilik etip tur. Endi qoǵamnyń árbir múshesi jaýapkershilikti túsinýi kerek. Syr halqy ǵasyrlar boıǵy tarıhynda talaı qıyndyqty eńsergen. Taǵy bir synaqty artta qaldyratyn kez keldi. Men sizderden azamattyq jaýapkershilik tanytýdy suraımyn», - dedi.
Gúlshara Ábdiqalyqova sonymen qatar jeke paraqshasyna kóptegen mańyzdy ári mazmundy usynystar kelip jatqanyn jetkizdi.
«Árqaısysy boıynsha basqarma jáne bólim basshylaryna tıisti tapsyrmalar berilgen. Biz halyqpen keri baılanysty turaqty túrde jalǵastyratyn bolamyz. Árbir pikir mańyzdy», - dedi ol.
Qazirgi tańda Qyzylorda oblysynda koronavırýs ınfektsııasy rastalǵan 119 adam bar.