Qyzylorda oblysynda koronavırýsqa qarsy preparattar baǵasy 27% arzandady
QYZYLORDA. QazAqparat - Qyzylorda oblysynda koronavırýsqa qarsy preparat baǵasy 27 paıyzǵa tómendedi, dep habarlaıdy QazAqparat tilshisi.
Oblys dárihanalarynda halyqtyń qajettiligin qamtamasyz etetetin dárilik zattar qory jetkilikti. Qazir qorda antıbıotıkterdiń 358 myń, vırýsqa qarsy preparattardyń 24 myń, antıkoagýlıanttardyń 93 myń, ystyqty túsiretin preparattardyń 179 myń qoraby bar.
«Byltyr óńirde koronavırýs ınfektsııasy órshigen tusta jaz aılarynda aýrýhanalar men provızorlyq ortalyqtarda dári-dármek tapshylyǵy baıqaldy. Bul halyqtyń qaltasyna aýyrlyq saldy. Qazir dári qory jetkilikti. Ári bıyl koronavırýsqa qarsy preparattardyń baǵalary 27 paıyzǵa tómendedi», - dedi oblystyq medıtsınalyq jáne farmatsevtıkalyq baqylaý departamentiniń bólim basshysy Nurbek Ádilhanov.
Aıta keteıik, qazirgi tańda «Qyzylorda» Óńirlik ınvestıtsııalyq ortalyǵy» JShS-men 17 farmatsevtıkalyq uıymǵa barlyǵy 281,2 mln teńge qarjy berildi. Olardyń 9-y qalada, 8-i aýdandarda ornalasqan. Bólingen qarajattan 280 mln teńgege ystyqty túsiretin, antıbıotıkter, vırýsqa qarsy, ımmýnostımýlıatorlar, medıtsınalyq buıymdar, ınektsııalyq jáne gormondyq preparattar satyp alyndy.
«Qazir Android jáne Appstore platformalarynda «DARI.KZ» mobıldik qosymshasy iske qosyldy. Osy mobıldik qosymshanyń kómegimen kez kelgen azamat respýblıka aýmaǵynda tirkelgen dárilik zattardyń barlyq tizbesin kóre alady. Paıdalanýshyǵa medıtsınada qoldanylýy jónindegi nusqaýlyq, qaptama maketteri, qoldaný tásilderi, sertıfıkattar, dárilik zattyń tolyq ataýy, óndirýshi týraly aqparat, tirkeý kýáliginiń nómiri, balamalar tizbesi, shekti baǵalary da kórsetilgen», - dedi N. Ádilhanov.
Eske salaıyq, Qyzylordada Syrdarııa aýdany koronavırýs boıynsha «qyzyl» aımaqqa engizildi.
