Qyzylorda oblysynda koronavırýsqa qarsy ekpe egý aqpan aıynda bastalady
NUR-SULTAN. QazAqparat - Qyzylorda oblysynda koronavırýstyq ınfektsııaǵa qarsy ekpe egý 2021 jyldyń aqpan aıynda bastalady, dep habarlaıdy Vedomstvoaralyq komıssııanyń baspasóz qyzmeti.
Qazirgi ýaqytta vaktsınatsııalaýǵa jatatyn toptar boıynsha adamdardyń sanyn naqtylaý, koronavırýstyq ınfektsııaǵa qarsy vaktsınany saqtaýǵa jáne tasymaldaýǵa arnalǵan qural-jabdyqtardy tekserý jáne egý pýnktteriniń jaraqtandyrylýy bóliginde uıymdastyrý is-sharalary júrgizilýde.
Telemedıtsına formatynda «Spýtnık V» vaktsınasynyn júrgizýdiń alǵysharttary, tasymaldaý jáne egý jumystaryn uıymdastyrý algorıtmi men vaktsınatsııalaý kórsetkishteri men qarsy kórsetilimderi taqyrybynda oblystyq medıtsınalyq uıymdardyń 65 jaýapty mamany men 324 epıdemıolog dárigerleri arnaıy oqytyldy.
Halyqtyń osal toptary úshin vaktsınatsııa aqysyz jáne erikti túrde júrgiziledi. Ekpe 2 kezińnen turady, ıaǵnı birinshi dozadan 21 kún ótken soń ekinshisi egiledi.
Oblys turǵyndary arasynda koronavırýstyq ınfektsııaǵa qarsy vaktsınatsııa júrgizý 154 egý kabınetteri belgilendi. Budan bólek shalǵaı eldi meken turǵyndaryna ekpe salý úshin 64 jyljymaly egý brıgadalary qarastyrylǵan.
Vaktsına salý aldynda densaýlyq jaǵdaıy boıynsha anamnez naqtylanady, eger dene temperatýrasy 37 gradýstan joǵary bolsa ekpe salynbaıdy. Sonymen qatar ınfektsııalyq jáne ınfektsııalyq emes aýrýdyń órshý kezeńi ekpe egýge qarsy kórsetilim bolyp tabylady. Bul jaǵdaıda vaktsına aýrýdan jazylǵannan keıin 2-4 aptadan soń júrgiziledi. Jeke qarsy kórsetilimder vaktsınatsııalaý aldynda aımaqtyq dárigermen resimdelinedi.
