Qyzylorda oblysynda koronavırýs juqtyrǵan 9 adamnyń barlyǵy Shıeli aýdanynan

QYZYLORDA. QazAqparat - Qyzylorda oblysynda koronavırýs juqtyrǵan sońǵy 9 adamnyń barlyǵy Shıeli aýdanynda turady. Bul jóninde oblystyq Taýarlar, qyzmetterdiń sapasy men qaýipsizdigin baqylaý departamentiniń Facebook paraqshasynan málim boldy, dep habarlaıdy QazAqparat tilshisi.

Naýqastardyń 3-ýi er adam bolsa, 6-ýy áıel adam. Olardyń arasynda eń kishisi 2012 jyly týǵan qyz. Al jasy eń úlkeni 1944 jylǵy er adam.

«Qazirgi tańda naýqastardyń jaǵdaıy qanaǵattanarlyq. Bekitilgen algorıtmge sáıkes naýqastarmen qarym-qatynasta bolǵan adamdar anyqtaldy. Olar medıtsınalyq baqylaýǵa alynp jatyr. Aýrý oshaqtarynda epıdzertteý jáne dezınfektsııalyq jumystar júrgizilýde», - dep málim etti vedomstvodan.

8 sáýir saǵat 22:35-tegi jaǵdaı boıynsha aımaqta koronavırýs ınfektsııasyna shaldyqqandar sany 85 adamdy qurady.

Olardyń 9-y Qyzylorda qalasynda, 16-y Jańaqorǵan aýdanynda tirkelse, Qarmaqshyda – 4, Shıelide – 47, Syrdarııada - 7, Aralda - 2 jaǵdaı anyqtaldy