Qyzylorda oblysynda koronavırýs bir aptada 70 adamnan anyqtaldy
QYZYLORDA. QazAqparat - Qyzylorda oblysynda sońǵy bir aptada 70 adam koronavırýs ınfektsııasyn juqtyrdy. Olardyń 64-i qala turǵyndary, dep habarlaıdy QazAqparat tilshisi.
Qazir Qyzylorda oblysy epıdemıologııalyq ahýaldy baǵalaý matrıtsasy boıynsha «jasyl» aımaqta tur. Degenmen sońǵy kórsetkishter oılandyrady.
Búginge deıin óńirde koronavırýs ınfektsııasyn juqtyrýdyń barlyǵy 3727 deregi tirkeldi. Al ótken táýlikte indettiń qursaýyna 13 adam ilikti. Olardyń barlyǵy Qyzylorda qalasynda turady. Tórteýinde dene qyzýynyń kóterilýi, entigý, qurǵaq jótel, keýde tusynyń aýyrsynýy sekildi klınıkalyq belgiler anyqtalǵan. Qalǵan toǵyz naýqasta aýrý sımptomsyz ótken.
«1 naýqastan PTR-taldaý somatıkalyq aýrýy boıynsha statsıonarǵa jatý aldynda profılaktıkalyq maqsatta alynǵan. Al 9 patsıent koronavırýs juqtyrǵan adamdarmen qarym-qatynasta bolýy sebepti tekserilgen. Sondaı-aq 3 adam aýrý sımtomynyń bolýyna baılanysty medıtsınalyq kómekke ózdiginen júgingen. Taldaý nátıjeleri koronavırýs ınfektsııasyna oń nátıje kórsetti. Naýqastarmen qarym-qatynasta bolǵan 49 adam medıtsınalyq baqylaýǵa alyndy. Profılaktıkalyq jáne epıdemııaǵa qarsy sharalar júrgizilýde», - dep málim etti Qyzylorda oblysy Sanıtarııalyq-epıdemıologııalyq baqylaý departamentiniń baspasóz qyzmetinen.
Vedomstvo aqparatyna sáıkes, jyl basynan beri tirkelgen jaǵdaılardyń basym bóligi qarym-qatynas arqyly juqqan. Onyń ishinde úı oshaǵynda jaqyn qarym-qatynastaǵylar arasynda jıi anyqtalýda.
Sondaı-aq, budan buryn bıyl Qyzylorda oblysynda koronavırýs juqtyrǵan azamattardyń deni oblys ortalyǵynda turatyny habarlandy.
