Qyzylorda oblysynda kólik apatynan eki adam qaza tapty

QYZYLORDA. QazAqparat - Qyzylorda oblysynda jol-kólik oqıǵasynan eki adam qaza taýyp, bir jolaýshy jaraqat aldy, dep habarlaıdy QazAqparat tilshisi.

Oqıǵa 8 tamyz kúni saǵat 03:30 shamasynda «Samara-Shymkent» tasjolynyń Aral aýdany, Qamystybas eldi mekeniniń tusynda bolǵan.

«Tekserý barysynda, Reseıden Ózbekstanǵa baǵyt alǵan «Chevrolet Nexia» avtokóligi qarama-qarsy baǵyttaǵy kele jatqan «Mercedes-Benz Sprinter» avtokóligine soqtyǵysqan. «Chevrolet Nexia» avtokóliginiń júrgizýshisi jáne bir jolaýshysy oqıǵa ornynda kóz jumdy. Al «Mercedes-Benz Sprinter» avtokóligindegi júrgizýshiniń janynda eki jolaýshy bolǵan. Onyń biri dene jaraqatymen Qazaly aýdandyq aýrýhanasyna jatqyzyldy», - dep málim etti Qyzylorda oblystyq polıtsııa departamentinen.

Vedomstvo málimetinshe, atalǵan derek boıynsha QR Qylmystyq kodeksiniń 345-babynyń 4- bóligimen sotqa deıingi tergeý júrip jatyr.

Tıisti saraptamalar taǵaıyndalǵan.

Eske salsaq, budan buryn Qyzylordada jasóspirimdi qaǵyp óltirgen mas júrgizýshi 1,5 jylǵa sottalǵan edi.