Qyzylorda oblysynda kóktemgi egis jumystary bastaldy
QYZYLORDA. QazAqparat - Qyzylorda oblysynda kóktemgi egis jumystary bastaldy. Dástúrli shara Shıeli aýdany «Aqmaıa» ınnovatsııalyq sharýa qojalyǵynda ótken «Dala kúni» dástúrli semınar-keńesi aıasynda júzege asty, dep habarlaıdy QazAqparat tilshisi.
Syr óńiri dıqandary «Aqmaıa» ınnovatsııalyq sharýa qojalyǵynyń jumysyna zer saldy. Onda mamandar agrosektordy damytý máseleleri boıynsha tájirıbe almasty. Munda «»Akmaya Smart Farm» aqyldy ferma» jobasy qolǵa alynǵan. Saltanatty sharaǵa Qyzylorda oblysynyń ákimi Qyrymbek Kósherbaev qatysty.
Semınar-keńes barysynda alǵashqy dán sebý rásimi ótkizildi. Sondaı-aq, oǵan qatysýshylar «Aqmaıa» sharýa qojalyǵynyń egis alqabynda aýyl sharýashylyǵy salasyn tsıfravızatsııalaý, agrodrondardy eginshilikte paıdalaný erekshelikteri, aýyl sharýashylyǵynyń jańa tehnıkalary men tehnologııalaryn óndiriske engizý sharalaryna nazar aýdardy. Sharýa qojalyǵynda ártaraptandyrý baǵytynda aýyl sharýashylyǵy daqyldarynyń ónimdiligin arttyrý maqsatynda jańa sorttardy paıdalaný men aýyl sharýashylyǵy daqyldaryn sýlandyrýda sý únemdeý tehnologııalaryn qoldaný máseleleri qarastyrylǵan.
Tuńǵysh Prezıdent - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna joldaýynda agroónerkásip kesheniniń áleýetin tolyq iske asyrý kerektigin aıtyp ótken-di. Onda memlekettik qoldaýdyń barlyq sharalaryn elimizge zamanaýı agrotehnologııalardy aýqymdy túrde tartýǵa baǵyttaý qajettiligine nazar aýdarylǵan.
«Bıylǵy dán sebý rásimin ótkizýge Shıeli aýdanyndaǵy Aqmaıa aýylyn beker tańdaǵan joqpyz. Syr óńirindegi kúrish ósirý tarıhyna úńilsek, osy aýyldyń topyraǵynan kezinde 16 Eńbek Eri shyqqan eken. Osyndaı qasıetti mekende bıyl da kúrish tuqymyn saýyqtyrý, ártaraptandyrý baǵytynda maıly, mal azyqtyq, kartop, baqsha daqyldarynyń ónimdiligin joǵarylatý jáne sýarmaly jerlerdi qalpyna keltirý baǵytynda birqatar jobalardy qarjylandyrý qolǵa alynǵan. Agroónerkásiptik keshendi damytýdyń memlekettik baǵdarlamasy boıynsha elimizde agrarlyq salada mańyzdy jobalar iske asyrylýda. Osy oraıda, Syr óńirinde de aýyz toltyryp aıtatyn jumystar júzege asyrylýda. Bir ǵana mysal, memlekettik qoldaýlardy utymdy paıdalanǵan oblys eginshileri sońǵy jyldary jyl saıyn el qambasyna jarty mıllıon tonna astyq quıyp keledi», - dedi oblys ákimi.
«Aqmaıa» sharýa qojalyǵy «aqyldy ferma» zııatkerlik geoaqparattyq formany qoldanatyn pılottyq sharýashylyq bolyp tabylady. Ol jedel navıgatsııany, óris derekterin tolyq taldaýdy jáne óndiristik protsesterdiń monıtorıngin qamtıdy. Bolashaqta jer bederiniń kartalaryn, egistikterdiń ártúrliligin, aýrýlardyń, aramshópterdiń jáne zııankesterdiń taralýyn, topyraq kartalaryn jáne sharýashylyq qyzmetin tsıfrlandyrý salasyndaǵy basqa da is-sharalardy qamtıtyn keńistiktik derekterdi tsıfrlaý boıynsha jumystardy júrgizýdi uıymdastyrý josparlanýda.
Bıyl Syr óńirinde 178,6 myń gektar aýyl sharýashylyǵy daqylyn egý josparlanyp otyr.Onyń ishinde basty daqyl - kúrish 83 myń gektardy quraıdy. Jergilikti dıqandar 100 myń gektardan astam aýmaqqa dándi jáne maıly daqyldar egýge nazar aýdarady. Sondaı-aq, azyqtyq daqyl, kartop, kókónis, baqsha daqyldaryn egýge de kóńil bólinedi. Sonymen qatar, 83 myń gektardan astam kúrish egý josparlanǵan.
Sonymen qatar, aǵymdaǵy jyly oblysta mal azyǵynyń mol qoryn jınaý maqsatynda ylǵal saqtaıtyn jańa tehnologııalardy (akvasorbent, agrogel) paıdalana otyryp, qunarly jerlerde mal azyqtyq daqyldar ósirý jobasy iske asyrylýda. Atap aıtqanda, Syrdarııa aýdanynday «Besaryq» sharýashylyq bazasynda akvasorbentterdi qoldaný arqyly 3 gektar bıdaı jáne 2 gektar saflor egilmek. Joba Y.Jaqaev atyndaǵy «Qazaq kúrish sharýashylyǵy ǵylymı zertteý ınstıtýtynyń» JShS ǵalymdarymen birlesip júzege asyrylýda.
