Qyzylorda oblysynda kóktaıǵaqtan zardap shekken 7 adam aýrýhanaǵa tústi

Qyzylorda qalasy men Aral, Qazaly aýdandarynda kóktaıǵaq saldarynan jaraqat alyp, jergilikti emdeý oryndaryna habarlasqan adamdar bar.
«Qyzylorda qalasynda búgin 64 adam emdeý oryndaryna habarlasyp, olardyń 5-i aýrýhanaǵa jatqyzyldy. Sondaı-aq, emdeý oryndaryna habarlasqan Aralda 5 adamnyń 1-i, Qazalyda 1 adam medıtsına mekemelerine jatqyzyldy», - dedi Qyzylorda oblystyq densaýlyq saqtaý basqarmasynyń baspasóz hatshysy Nurjamal Tursynbaeva.

Qyzylorda qalasy kóshelerin kóktaıǵaqtan tazartý jumystary qolǵa alyndy. Qyzylorda qalalyq ishki saıasat bóliminiń habarlaýynsha, qala kóshelerin jáne jaıaý júrginshiler joldaryn muzdan tazalaý maqsatynda saǵat 9.30-dan bastap «Qyzylorda tazalyǵy» mekemesine qarasty arnaıy kólikter arqyly 180 tonna qum men tuz aralas qospa sebilgen.



Qyzylorda qalalyq bilim bólimi aýa raıynyń qolaısyzdyǵy saldarynan 30 qańtar kúngi ekinshi aýysymdaǵy oqýshylar sabaǵy ótkizilmeıtinin habarlady. Atalmysh sabaq kestesi aldaǵy senbi kúnge aýystyrylǵan. Búgin tańerteń Qyzylorda oblystyq tótenshe jaǵdaılar departamentiniń habarlaýynsha, respýblıkalyq «Samara-Shymkent» jolynyń Qyzylorda men Baıqońyr aralyǵyndaǵy bóligi jabyldy.

Esterińizge sala ketelik, aýa raıy qolaısyzdyǵyna baılanysty Qyzylorda qalasynan Qaraǵandy oblysyna deıingi aralyqta kólik qozǵalysy shekteldi.