Qyzylorda oblysynda qoǵamdyq jumystan jaltarǵan turǵyn bas bostandyǵynan aıyryldy
BAIQOŃYR. QazAqparat – Qoǵamdyq jumystardy oryndaýdan jaltarǵan Baıqońyr turǵyny bas bostandyǵynan aıyryldy, dep habarlaıdy QazAqparat.
Baıqońyr qalalyq probatsııa qyzmetiniń esebinde turǵan azamat A. bıylǵy 15 aqpanda 200 saǵatqa qoǵamdyq jumystarǵa tartý jazasyna sottalǵan bolatyn. Alaıda ol qoǵamdyq jumystardy oryndaý úshin jergilikti atqarýshy organǵa múldem barmaı, mindettelgen jumystardy oryndaýdan birneshe ret dáleldi sebeptersiz jaltarǵan. Osyǵan baılanysty Qyzylorda oblysy Baıqońyr qalalyq sotyna qoǵamdyq jumystarǵa tartý túrindegi jazasynyń ótelmegen bóligin bas bostandyǵynan aıyrý jazasyna aýystyrý týraly usynym joldanǵan.
Nátıjesinde azamat A.-nyń qoǵamdyq jumystarǵa tartý túrindegi jazasynyń ótelmegen 200 saǵaty 50 táýlikke bas bostandyǵynan aıyrý jazasyna aýystyryldy. Ol jazasyn qylmystyq-atqarý júıesiniń qaýipsizdigi ortasha mekemesinde óteıdi. Qaýly zańdy kúshine 14 sáýirde endi.
«Qazirgi kúni azamat A.-ny QR ІІM Baıqońyr qalasyndaǵy ókildiginiń qyzmetkerleri ustap, ýaqytsha ustaý ızolıatoryna qamady. Sot úkimimen taǵaıyndalǵan jazany oryndaý jáne jaza óteý sharttaryn saqtaý ár sottalýshynyń mindeti bolyp tabylady. Eger, bul talaptar oryndalmaǵan jaǵdaıda, zań talaptaryna sáıkes qatań sharalar qoldanylatyndyǵy eskerilgen jón», - deıdi Baıqońyr qalalyq probatsııa qyzmetiniń bastyǵy A. Tanbaev.
