Qyzylorda oblysynda kene shaqqan turǵyn kóz jumdy
QYZYLORDA. QazAqparat - Búgin óńirlik kommýnıkatsııalar qyzmetinde ótken brıfıngte Qyzylorda oblysy densaýlyq saqtaý basqarmasy basshysynyń orynbasary Nurjamal Myrzaǵalıeva oblysta kene entsefalıtinen bir adamnyń qaıtys bolǵanyn aıtty, - dep habarlady QazAqparat HAA tilshisi.
Ol Shıeli aýdany Sulýtóbe aýyldyq okrýgine qarasty 15-shi bekette mal sharýashylyǵymen aınalysqan. Aıaqasty aýyrǵan ol 24 sáýir kúni túnde Qyzylorda oblystyq juqpaly aýrýlar aýrýhanasyna túskenimen, jaǵdaıy ońalmaı, bir táýlikten keıin qaıtys boldy.
Jalpy, bıyl jyl basynan beri oblys boıynsha barlyǵy 97 kene shaǵý jaǵdaıy tirkeldi. Ótken jyldyń alǵashqy tórt aıynda 292 kene shaǵý jaǵdaıy tirkelip, KQGQ-na kúdikti 1 jaǵdaı anyqtalǵan bolatyn.
Oblystyq qoǵamdyq densaýlyq saqtaý departamenti basshysynyń mindetin atqarýshy U.Ahanaevanyń aıtýynsha, bıyl aımaqta KQGQ-nan qolaısyz 117 eldi óńir tizimi jasaqtalǵan. Onyń ishinde 28 eldi meken Shıeli aýdanynda tirkelip otyr.
«Bekitilgen kestege sáıkes 10 sáýirden basap Shıeli, Jańaqorǵan aýdandarynda kenege qarsy óńdeý, zalalsyzdandyrý jumystary aıaqtaldy. 25 sáýirden bastap Qyzylorda qalasyndaǵy 7 qolaısyz eldi mekende zalalsyzdandyrý jumystary bastaldy», - deıdi U.Ahanaeva.
