Qyzylorda oblysynda kásipkerlikti damytýǵa baǵyttalǵan tyń bastama kóterildi
QYZYLORDA. QazAqparat - Qyzylorda oblysy Jańaqorǵan aýdanynda jappaı kásipkerlikti damytý maqsatynda «Jańaqorǵan - erkin bıznes alańy» atty bastama qolǵa alyndy, dep habarlaıdy QazAqparat.
Jańaqorǵan aýdany ákimi Ǵalym Ámireevtiń aıtýynsha, búginde Jańaqorǵan Qyzylorda oblysyndaǵy aýdandar arasynda kásipkerlikti damytý boıynsha kósh bastap tur. Bıylǵy jeti aıdyń ózinde aýdanda 315 kásipkerlik sýbektisi tirkelgen. Jumys jasaıtyn 3141 kásipkerlik sýbektisiniń 1889-y jeke kásipkerler. Onda jumys jasaıtyn azamattardyń sany 9213 adam.
Ǵalym Ámireev ásirese, «Atameken» UKP qolǵa alǵan jappaı kásipkerlikti damytýǵa arnalǵan «Bastaý Bıznes» jobasynyń tıimdiligine erekshe toqtaldy.
«Bıyl aýdanda 179 adam osy joba boıynsha biliktiligin jetildiredi dep josparlanǵan bolatyn. Búgingi kúnge deıin olardyń 90-y oqýyn támamdady. Qazir aýdanda «Aýyl sharýashylyǵyn qarjylaı qoldaý qory» AQ Qyzylorda oblystyq fılıaly arqyly jalpy quny 161,6 mln.teńgeni quraıtyn 75 azamattyń jobasy iriktelip, tizimi qalyptastyryldy. Nátıjesinde 120 jańa jumys orny ashylady dep kútilýde», - deıdi aýdan basshysy.
Brıfıngte Jańaqorǵan aýdanynyń ákimi Ǵalym Ámireev aýdanda jappaı kásipkerlikti damytýǵa arnalǵan óńirdegi teńdessiz bastamany tanystyrdy. Aýdanda bıyl pılottyq rejımde kásippen aınalysamyn degen azamattarǵa ýaqytsha tegin jer úlestirgen. Ol úshin aýdandyq bıýdjetten arnaıy qarjy bólip, Jańaqorǵan kenti aýmaǵynan 50 gektar jerdi qorshap, paıdalanýǵa ázirlegen. Sosyn iske ıkemi bar degen aýdannyń 12 azamatyna 0,5-2 gektarǵa deıin atalmysh jerdi bólip berip, sý máselesine deıin sheship bergen. Aýdan ákimdigi osy azamattardy mamandar shaqyrtyp oqytyp, biliktiligin jetildiredi. Jobaǵa qatysýshy azamattar 1 gektar jerge 130-150 myń teńgege jýyq qarjy salyp, nátıjesinde 700 myń - 1 mln.teńgege deıin tabys tapqanyn aıtýda.
Aýdan ákimi mundaı qadamǵa azamattardyń jeke kásippen aınalysýǵa degen qyzyǵýshylyǵyn arttyrý úshin barǵandyǵyn jetkizdi. Ol úshin kásippen aınalysqysy keletin azamattardan eshqandaı qujat, qarjy talap etpeı, jerdi ýaqytsha paıdalanýǵa bergen. Aýdan basshylyǵy nátıjesin kórgennen keıin bastamany odan ári jalǵastyrýdy josparlaýda. Bastamaǵa «Jańaqorǵan - erkin bıznes alańy» ataýyn berip, júzege asyrý mehanızmderin de usynyp otyr. Bastamaǵa qatysýshylar jerdi ýaqytsha paıdalana alady nemese aýktsıon arqyly satyp ala alady.
