Qyzylorda oblysynda kásipkerlerdi qorǵaý nátıjeleri jarııalandy - prokýratýra
«Osy oraıda mobıldik toptardyń jumysy kúsheıtilip, olarǵa shaǵym berý tártipteri jáne senim telefondary týraly málimetter prokýratýranyń, kásipkerler palatasynyń resmı saıttary men áleýmettik jelilerinde jańartylyp, oblys jáne aýdan ortalyqtarynda bılbordtar ornatyldy. Nátıjesinde, mobıldik toptarǵa kásipkerlerden ótken 2020 jyly barlyǵy 13 aryz-habarlama tússe, 2021 jyldyń 5 aıynda 30 aryz-habarlama túsip, óńirdegi bıznestiń prokýratýraǵa senim deńgeıi artýda. Aǵymdaǵy bıznesti qorǵaý boıynsha atqarylǵan jumystardyń nátıjesinde 17 prokýrorlyq qadaǵalaý aktileri engizilip, 117 kásipkerdiń quqyǵy qorǵaldy. 16 tulǵa tártiptik, 1 laýazymdy tulǵa ákimshilik jaýapqa tartylsa, 2 zańsyz tekserýdiń jáne kásipkerlerge qatysty 9 ákimshilik óndiristiń kúshi joıyldy» delingen habarlamada.
Mysaly, «QazBuilndings» JShS-niń dırektory N.Deneevtiń aryzyn qaraý kezinde Qyzylorda oblysynyń memlekettik sáýlet-qurylys baqylaý basqarmasy tarapynan qurylys-montajdaý jumystaryna lıtsenzııa berýden eki ret negizsiz (zańmen kózdelmegen talap qoıǵan) bas tartylǵany anyqtalyp, basqarma basshysyna qatysty ákimshilik is qozǵaldy. Qyzylorda qalasynyń mamandandyrylǵan ákimshilik sotynyń 29 naýryz 2021 jylǵy qaýlysymen basqarma basshysy ákimshilik jaýapkershilikke tartylyp, oǵan 61 257 teńge aıyppul salyndy.
Kásipkerlerden túsken aryzdardyń basym bóligi kedergilerdi azaıtyp, erkin jumys isteýge qolaıly jaǵdaı jasaýǵa baǵyttalǵan. Bul jaǵy da eskerýsiz qalmady. Oblystyq prokýratýranyń narazylyǵyna sáıkes, oblystyń bas memlekettik sanıtarııalyq dárigeriniń qaýlysyna ózgerister engizilip, kóptegen kásipkerlik sýbektilerge belgilengen jumys ýaqyty boıynsha shekteýler alynyp, jekelegen bıznes sýbektileriniń jumys ýaqyty uzartyldy.
«Karantın talaptarynyń saqtalýy boıynsha sanıtarııalyq- epıdemıologııalyq baqylaý organymen bir kásipkerge eki ret zańsyz tekserý júrgizilgeni anyqtalyp, tekserý taǵaıyndaý, tekserý nátıjesi týraly aktilerdiń jáne uıǵarymdardyń kúshi joıyldy. Memlekettik kirister organynyń 2 kásipkerge qatysty 5 jáne agroónerkásip keshenindegi ýákiletti organnyń 3 kásipkerge qatysty zańsyz toltyrǵan 3 ákimshilik quqyq buzýshylyq týraly hattamalarynyń kúshi joıyldy. Memlekettiń tapsyrys boıynsha bilim berý qyzmetin kórsetken 75 jeke balabaqshanyń 192,9 mln teńge bıýdjet beresheginiń tólenýi qamtamasyz etildi», - dep atalyp ótken prokýratýra aqparatynda.
Munymen qosa, Óńirlik kásipkerler palatasymen birlese atqarylǵan jumystardyń nátıjesinde ShJQ «Qazaly aýdanaralyq aýrýhanasy» KMK-y tarapynan dári-dármekter men medıtsınalyq buıymdardy satyp alý sharttary boıynsha farmatsevtıkalyq kompanııalar aldynda qalyptasqan 87,4 mln teńge qaryzdyń tólenýi qamtamasyz etildi.