Qyzylorda oblysynda karantın talaptary birshama jeńildetildi
QYZYLORDA. QazAqparat - Qyzylorda oblysynda búginnen bastap karantın talaptary birshama jeńildetildi, dep habarlaıdy QazAqparat tilshisi.
Bul jóninde Qyzylorda oblystyq sanıtarııalyq-epıdemıologııalyq baqylaý departamentinen málim etti.
Osy oraıda Qyzylorda oblysy bas memlekettik sanıtarııalyq dárigeriniń arnaıy qaýlysy shyqqan.
Endigi kezekte ekinshi toqsannan bastap qala jáne aýyl mektepterinde synyptaǵy balalar sanyn 15 adamnan asyrmaı dástúrli formatta oqytýǵa bolady. Onda kontıngent 300 oqýshyǵa deıin bolýy tıis.
Ata-analardyń ótinishimen synyptaǵy balalardyń sanyn 15-ten asyrmaı kezekshi synyptar uıymdastyrylady. Ol jalpy bilim beretin mektepterde 1 men 5, halyqaralyq mektepterde 7 synypqa deıingi aralyqty qamtıdy.
Sondaı-aq, óńirdegi teatr qyzmetinde zaldy 50 paıyzǵa deıin toltyrýǵa ruqsat etildi. Basty talap - zaldaǵy adam sany 100-den aspaýy tıis. Oǵan qosa maska rejımi jáne áleýmettik qashyqtyq talaptary nazarǵa alynady.
Qaýlyda kórsetilgenindeı, dinı nysandar men meshitterde qudaıǵa qulshylyq etý sharasyn sanıtarlyq-dezınfektsııalyq rejımdi qatań saqtaı otyryp ótkizýge bolady. Bul jaǵdaıda zaldyń syıymdylyǵy 30 paıyzdan nemese 100 adamnan aspaýy tıis.
Aımaqta búginge deıin koronavırýs ınfektsııasynyń 3262 jaǵdaıy tirkeldi. Onyń ishinde klınıkalyq belgisimen - 1801, klınıkalyq belgisinsiz - 1461 jaǵdaı anyqtaldy.
