Qyzylorda oblysynda karantın talabyn buzýdyń 459 faktisi tirkeldi

QYZYLORDA. QazAqparat - Qyzylorda oblysynda jyl basynan beri karantın talabyn buzýdyń 459 oqıǵasy tirkeldi. Olardyń basym bóligi – oblys ortalyǵynyń turǵyndary, dep habarlaıdy QazAqparat tilshisi.

Aıta keteıik, monıtorıngilik top músheleriniń qatysýymen jyl basynan beri 12 441 nysanǵa reıdtik tekseris júrgizildi. Nátıjesinde karantın talabyn buzýdyń 459 faktisi anyqtaldy.

«Anyqtalǵan jaǵdaılardyń basym bóligi Qyzylorda qalasynda tirkelgen. Atap aıtqanda, oblys ortalyǵynda top músheleri karantın talabyn buzýdyń 118 deregin anyqtasa, ol aýdandar boıynsha Aralda - 56, Qazalyda - 66, Qarmaqshyda - 60, Jalaǵashta - 37, Syrdarııada - 44, Shıelide - 33, Jańaqorǵanda - 45 oqıǵany quraıdy. Anyqtalǵan buzýshylyqtar boıynsha QR Ákimshilik quqyq buzýshylyq kodeksiniń 425-babyna sáıkes barlyǵy 335 mln teńgege jýyq ákimshilik aıyppul salyndy», - dep málim etti oblystyq Sanıtarlyq-epıdemıologııalyq baqylaý departamentinen.

Sondaı-aq, Qyzylorda oblysynda «Ashyq» júıesi 2021 jyldyń 26 sáýirinen bastap engizildi. Búginde sanıtarııalyq-epıdemıologııalyq baqylaý qyzmetimen «Ashyq» júıesi arqyly anyqtalǵan «qyzyl» mártebesi bar birqatar tulǵaǵa oqshaýlaný rejımin buzǵandyǵy úshin ákimshilik aıyppul salyndy. Olar qoǵamdyq tamaqtaný oryndaryna, halyqqa qyzmet kórsetý ortalyǵyna, Qorqyt ata atyndaǵy áýejaı men temirjol vokzalyna kirý kezinde anyqtalǵan.

Qyzylorda oblysynyń sanıtarııalyq-epıdemıologııalyq baqylaý departamenti «Ashyq» júıesi arqyly anyqtalǵan «qyzyl» mártebesi bar azamattar tizimin jarııalady. Olardyń qatarynda oblys ortalyǵy turǵyndarynyń sany basym.