Qyzylorda oblysynda iri mólsherde esirtki ekken turǵyndar ustaldy

«Qarasora – 2023» jedel-profılaktıkalyq is-sharasy aıasynda Qyzylorda oblysy Qazaly aýdanynda prokýratýra, aýdandyq ákimdik jáne polıtsııa bóliminiń qyzmetkerlerimen birlesip júrgizgen jumystar nátıjesinde 1 086 túp sora ósimdigin ekken qala turǵyndary ustaldy, dep habarlaıdy QazAqparat Polisia.kz-ke silteme jasap.

28-50 jastaǵy jumyssyz tórt qala turǵyny Qyzylorda oblysy Qazaly aýdanyna qarasty Qyzylqum aýylynyń 265 shaqyrym jerdegi sheńgel men sekseýil arasyna sora ósimdigin ósirgen.

Aıta keterlik jaıt, arnaıy baptap ósirilgen soranyń uzyndyǵy 20 santımetrge jetken. Polıtseıler oqıǵa ornynan iri esirtki alqabynan bólek arnaıy keptirilgen marıhýana, kúdiktilerdiń jeke zattaryn, azyq-túlik, sora ósirýge arnalǵan arnaıy jabdyqtar: 20 metrlik shlanga, kúrek, ketpen, tyrma, gaz ballonyn tárkiledi. Esirtki alqaptan bólek alynǵan arnaıy keptirilgen marıhýananyń salmaǵy 723 gramm bolyp shyqty.

Kúdiktiler Qazaly aýdandyq polıtsııa bóliminiń ýaqytsha ustaý ızolıatoryna qamaýǵa alyndy.

Atalǵan derek boıynsha QR QK-niń 300-babynyń 2-bóligimen sotqa deıingi tergep-tekserý isi júrgizilip jatyr.