Qyzylorda oblysynda ınfraqurylymmen qamtylǵan 6 ındýstrııalyq aımaq jumys isteıdi
QYZYLORDA. QazAqparat - Qyzylorda oblysynda ınfraqurylymmen qamtylǵan 6 ındýstrııalyq aımaq jumys isteıdi, dep habarlaıdy QazAqparat tilshisi.
Bıyl óńirge 456 mlrd. teńge ınvestıtsııa tartý josparlanyp otyr. Bul kórsetkishti 2025 jylǵa qaraı 1,5 trln. teńgege deıin jetkizý bekitilgen. Aımaqta qajetti ınfraqurylymmen qamtylǵan 6 ındýstrııalyq aımaq jumys istep jatyr. Onda jalpy quny 207,7 mlrd. teńge quraıtyn 62 joba ornalasyp, 22-i iske qosyldy.
«Memelket basshysynyń Joldaýynda aıtylǵandaı, sheteldik jáne otandyq ınvestorlardy elimizge shaqyra otyryp, olardyń ınvestıtsııalyq jobalaryn iske asyrý maqsatynda tıisti jumystar júrgizilýde. Investorlar óńdeý ónerkásibine ınvestıtsııa salsa, jańa jumys orny ashylady», - dedi oblystyq ındýstrııalyq-ınnovatsııalyq damý basqarmasy basshysynyń mindetin atqarýshy Jolmyrza Elaman.
Osy baǵyttaǵy jumysty jalǵastyrý maqsatynda «Bıznestiń jol kartasy-2025» baǵdarlamasy aıasynda 2021-2022 jyldary respýblıkalyq jáne jergilikti bıýdjetten 11 ınvestıtsııalyq jobaǵa jalpy quny 5,5 mlrd. teńgege ınjenerlik ınfraqurylym jetkizý máselesi qarastyrylýda. Buǵan qosa, qosymsha taǵy 4 ınvestıtsııalyq jobaǵa ınjenerlik ınfraqurylym jetkizý máselesi pysyqtalýda.
Ekonomıkany ártaraptandyrý jumystary ındýstrııalandyrý baǵdarlamasy aıasynda iske asyrylýda. Baǵdarlama aıasynda quny 543 mlrd. teńgeden asatyn 46 jobany júzege asyrý kózdelýde.
Sonymen qatar, bıylǵy jyly iske qosylatyn 4 jobanyń 2-iniń ónimi ınnovatsııalyq sıpatta jáne eksportqa baǵyttalǵan. Olar - shyny zaýyty jáne as tuzyn óndiretin ІІІ ıspan tsehy. Sondaı-aq, osy jyly jańa ónim túrin shyǵaratyn «Shalqııa» ken ornynda qorǵasyn-myrysh óńdeý kombınaty jáne kaltsılengen soda óndiristeri qurylysyn bastaý josparda tur.
Eske salsaq, Qyzylorda oblysynyń 2025 jylǵa deıingi damý josparynyń jańartylǵan jobasy jasaldy.
