Qyzylorda oblysynda gektaryna 52 tsentnerden astam kúrish alynady
ASTANA. QazAqparat - Bıyl Qyzylorda oblysynda gektaryna 52 tsentnerden artyq kúrish alynady. Bul týraly búgin eloradada ótip jatqan Qyzylorda oblysynyń aýyl sharýashylyǵy jármeńkesinde óńirdiń aýyl sharýashylyǵy basqarmasynyń basshysy Baqyt Jaqanov málim etti.
«Bıyl óńirimizde aýyl sharýashylyǵy daqyldarynyń ónimdiligi jaqsy bolyp tur. Alǵashqy ónimderimizdi Táýelsizdigimizdiń 25 jyldyq mereıtoıyna oraı elorda jurtshylyǵyna jetkizdik. Oblysymyzdan 280 tonna aýyl sharýashylyǵy ónimi tıelgen 26 kólikpen 50 kásipkerimiz keldi», - dedi ol.
Sonymen qatar ol kúrish oraǵyna qatysty derektermen de bólise ketti.
«Kúrish bastyrý jumystary qazan aıynda ǵana aıaqtalady. Sol kezde gektaryna qansha tsentnerden ónim alynǵandyǵyn aıtýǵa bolady. Degenmen, qazirdiń ózinde gektaryna ótken jylmen salystyrǵanda 2 tsentnerge artyq ónim alynýda. Ótken jyly gektaryna 50 tsentnerden aınalǵan edi»,- dedi ol.
