Qyzylorda oblysynda elektr jelileri jańǵyrtylady
Oblysta 10 121 shaqyrym elektr jelisi, 1 867 qosalqy stantsııa bar. Jylma-jyl bul baǵytta nátıjeli jumystar atqarylyp keledi.
«Bıyl «Qyzylorda qalasynda elektr jelilerin damytý, qaıta qurý jáne jańǵyrtý» qarjylyq-ekonomıkalyq negizdemesimen baǵdarlama daıyndaldy. Osynyń nátıjesinde quny 3,1 mlrd teńge joba qolǵa alynady. Ol eki kezeń boıynsha júzege asady. Qazir oblystyq bıýdjetten 1,6 mlrd teńge bólindi. Oǵan qajetti jabdyqtar satyp alyndy. Ony qyrkúıek aıynyń sońyna deıin bitirý josparlanǵan», – deıdi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Qaısar Mustafaev.
Bólingen qarjy boıynsha 35 10/0,4 kV qosalqy stantsııalary aýystyrylyp, 27 transformatorǵa kúrdeli jóndeý júrgiziledi.
Qosymsha aýystyrýdy qajet etetin 31 shaqyrymnan astam elektr jelisi bar.
Oblys boıynsha aýdan jáne aýyldardaǵy joǵarǵy kerneýdegi jelilerdiń tozýyna baılanysty 10 joba jasalýy tıis.
Qazir bul boıynsha oblystyq ekonomıka jáne qarjy basqarmasyna ótinim berilgen.
Sonymen qatar Syrdarııa ózeniniń sol jaǵalaýyn elektrmen jabdyqtaý boıynsha eki kezeńnen turatyn joba ázirlenip jatyr.
Al byltyr «Qyzylorda elektr taratý toraptary kompanııasy» AQ kúrdeli jáne aǵymdaǵy jóndeý jumysyna 294 mln teńge bólingen.
«Budan bólek, byltyr ınvestıtsııalyq baǵdarlama boıynsha 345 mln teńge qaralyp, 33 shaqyrymnan astam elektr jelisi aýystyryldy. Elektr energııasyn avtomatty esepke alý aspaptaryna qosý, №9 ortalyq elektr taratý qondyrǵysyndaǵy 10 kV-tyq birinshi sektsııa uıashyqtary jańartyldy. Kompanııa oblystyq bıýdjet arqyly 548 mln teńgeden astam qarjyǵa qaladaǵy «Sılıkatnaıa», «Komsomol» qosalqy stantsııalarynda 35/10 kV úsh transformatordy jańasyna aýystyrdy. Sondaı-aq, 4 vakýmdy ajyratqysh satyp alynǵan edi. Qazir «Promyshlennaıa» qosalqy stantsııasyna osy ajyratqyshtar ornatylýda», - deıdi «Qyzylorda elektr taratý toraptary kompanııasy» AQ basqarma tóraǵasynyń óndiris jónindegi orynbasary, bas ınjener Nurbaı Іztileýov.
Al bıyl kompanııadan oblys boıynsha kúrdeli jáne aǵymdaǵy jóndeý jumystaryna 311 mln teńge qarastyrylǵan.
Budan bólek, ınvestıtsııalyq baǵdarlama sheńberinde Qyzylorda qalasyndaǵy elektr jelilerin jańartýǵa 371 mln teńgeden astam qarjy bólý josparlanyp otyr.
Sondaı-aq, Qyzylordada qýaty 240 megavattyq elektr energııasy men 277 gıgakalorııa jylý energııasyn beretin zamanaýı jylý elektr ortalyǵy salynady.
Qazirgi tańda jańa nysannyń joba-smetalyq qujattary ázirlenip, qondyrǵy óndirýshi mekemelermen kelisim jasalyp jatyr.
Byltyr QR Energetıka mınıstrligimen ótkizilgen aýktsıon nátıjesinde «Aksa Enerdjı» túrik kompanııasymen jańa zamanaýı jylý elektr ortalyǵyn salýǵa kelisim jasaldy.
Qazir atalǵan nysanǵa jylý elektr ortalyǵynyń aımaǵynan 3,5 gektar jer berildi.
Tyń joba elimizdiń Energetıka mınıstrliginiń árdaıym baqylaýynda bolady.
Jalpy bul ınvestor qarjysyna salynatyn respýblıkamyzdaǵy alǵashqy jylý elektr ortalyǵy bolmaq.
Úsh jyl kóleminde jańa nysannyń qurylysy salynyp, 2025 jyly halyq ıgiligine tabystalady.
