Qyzylorda oblysynda elektr energııasyna baılanysty shekteý toqtatylady
Búgin oblys ákimi Gúlshara Ábdiqalyqova energetıka salasyndaǵy ózekti máseleler boıynsha otyrys ótkizdi. Jıynǵa oblys ákiminiń orynbasary Nurlan Tileshev, tıisti basqarma jáne departament, energetıka salasyndaǵy mekeme mamandary qatysty. Otyrys barysynda qarashadan bastalǵan respýblıkanyń ońtústik óńirlerindegi elektr energııasynyń jetispeýshiligi saralandy. Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Erlan Jańabaevtyń málimetinshe, búgingi kúni óńirdiń jalpy elektr energııasyn tutyný kólemi 172 megavat. Onyń 51 megavaty «Qyzylordajylýelektr ortalyǵynan» alynsa, 10 megavatyn «CKZ-U» seriktestigi óndiredi. Qalǵan 111 megavat syrttan jetkiziledi. Sońǵy kúnderi oblys boıynsha táýligine ortasha eseppen 30-50 megavat aralyǵynda elektr energııasynyń jetispeýshiligi kórinis berdi. Saldarynan óńirdegi keıbir eldi mekenderde kúndelikti keshki saǵat 6-dan 8-ge deıin tutynýshylarǵa elektr energııasy shekteldi.
Osyǵan baılanysty Energetıka mınıstrligi Jambyl GRES-tiń 3 jáne 4 blogyn iske qosýǵa sheshim qabyldady. Aldaǵy ýaqytta ońtústik óńirdi, onyń ishinde Qyzylorda oblysyn elektr energııasymen tolyqtaı qamtamasyz etý josparlanýda. Bul rette aımaqtaǵy energııamen jabdyqtaýshy uıymdar Jambyl GRES-pen qajetti elektr energııanyń kólemin alýǵa qosymsha kelisimshart jasaldy. Nátıjesinde qala, aýdan kóleminde elektr energııasyn shekteý toqtatylady.
Aımaq basshysy energııa jabdyqtaýshy uıymdar usynǵan elektr energııanyń shekti baǵasyna ótinimin Tabıǵı monopolııalardy retteý komıtetiniń Qyzylorda oblysy boıynsha departamenti arqyly tarazylap, tıisti usynystar engizý qajettigin qaperge saldy. Sondaı-aq, elektr energııasy týraly turǵyndar arasynda týyndaǵan shaǵymdardy eskerip, naqty túsindirý jumystaryn kúsheıtýdi tapsyrdy.
«Turǵyndar elektr energııasynan tapshylyq kórmeýi kerek. Qajetti kelisimder men naqty mehanızmderdi qabyldaý - sizderdiń mindetterińiz. Jetispeýshilik bolǵan jaǵdaıda elektr taratý mekemelerindegi rezervtik resýrstardy paıdalanyp, amal-áreketterdi uıymdastyrýlaryńyz qajet», - dedi Gúlshara Ábdiqalyqova.
Eske salsaq, Qyzylordada tirekti eldi mekenderdi gazǵa qosý qarqyndy júrgizilýde.
