Qyzylorda oblysynda ekpe qabyldaýǵa qabiletti turǵyndardyń 65,9%-y vaktsına saldyrdy

QYZYLORDA. QazAqparat - Qyzylorda oblysynda koronavırýsqa qarsy ekpe qabyldaýǵa qabiletti turǵyndardyń 65,9%-i vaktsına saldyrdy, dep habarlaıdy QazAqparat tilshisi.

Qazirge deıin óńirde 263 myńnan astam koronavırýsqa qarsy vaktsınanyń birinshi komponentin saldyrsa, ekinshi komponentimen 211 myńnan astam adam qamtyldy.

Jyl basynan beri oblys boıynsha 14 859 adamnyń indet juqtyrǵandyǵy anyqtalsa, búginde onyń 82 paıyzy saýyǵyp shyqty. Al, pnevmonııamen aýyrǵan 2019 naýqastyń 1741-i ıaǵnı 86,2% emdeldi.

Aımaqtaǵy epıdemıologııalyq ahýal qatań baqylaýda. Qazirgi tańda ınfektsııalyq tósek-oryn sany 2160, onyń ishinde reanımatsııalyq tósek-oryn sany 164. Júkteme 49,5 paıyzdy qurap otyr. Rezervtik oryn sanyn qosqanda 3200 tósek-orny ázirlenip, onyń 518 orny ortalyqtandyrylǵan ottegimen jabdyqtalǵan.

«Oblysta rejımdi túrde 6 ottegi shyǵarý stantsııasy jumys jasaýda. Dári-dármek qory qalyptasqan. Koronavırýs ınfektsııasyna qarsy kúres jumystaryna qajetti medıtsınalyq kadrlar men qural jabdyqtar jetkilikti. Atap aıtqanda, medıtsınalyq uıymdar 686 ottegi kontsentratorymen, 8 kompıýterlik tomograf, 66 rentgen apparatymen qamtylyp, 11 PTR apparaty iske qosylǵan. Táýligine 1300-1500 aralyǵynda synama alynýda. Qajettilik týyndaǵanda zertteý sanyn 3500-ge deıin jetkizýge múmkindigimiz bar», - dedi oblystyq densaýlyq saqtaý basqarmasy basshysynyń orynbasary Jalǵasbek Úsenov.

Aıta ketsek, Qyzylordadaǵy «SKZ-U» mekemesiniń qyzmetkerleriniń 99 paıyzy vaktsına saldyrdy.