Qyzylorda oblysynda eki konteıner órtenip úsh adamdy kúıik shaldy

QYZYLORDA. QazAqparat - Qyzylorda oblysyndaǵy Qumkól trassasy boıynda japsarlas salynǵan eki konteıner janyp, úsh adamdy kúıik shaldy, dep habarlaıdy QazAqparat tilshisi.

Oqıǵa 26 qańtarda «Qyzylorda-Qumkól» trassasynyń 25 shaqyrymynda seriktestikterdiń birine qarasty baqylaý ótkizý beketinde bolǵan.

«Eki konteınermen birge ondaǵy turmystyq zattar da tolyǵymen jandy. Órt oshaǵynan qutqarýshylar 50 lıtrlik gaz ballonyn syrtqa shyǵardy. Oqıǵada kúıik alǵan úsh adam jedel járdem qyzmetine tapsyryldy. Oqıǵanyń mán-jaıy anyqtalyp jatyr», - dep málim etti oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetinen.

Esterińizge sala ketelik, budan buryn Qyzylorda oblysynda turǵyn úı órtenip ketken edi.