Qyzylorda oblysynda eki er adam asa iri kólemdegi esirtkimen ustaldy

QYZYLORDA. QazAqparat – Qyzylordada patrýldik polıtsııa qyzmetkerleri asa iri kólemde esirtki tasymaldaǵan eki adamdy ustady, dep habarlaıdy QazAqparat Rolisia.kz-ke silteme jasap.

Qyzylorda oblysynyń polıtseıleri «Qarasora» reıdin ótkizgen. Onyń barysynda Aral aýdany tusynda «Samara – Shymkent» tasjolynda jol erejesin buzǵan Toyota avtokóligin toqtatqan.

«Tekserý barysynda kólikten sómkege salynǵan jasyl tústi zat anyqtalyp, aıǵaqzat retinde alyndy. Saraptama qorytyndysymen alynǵan zat 25,2 kg astam keptirilgen marıhýana ekendigi naqtylandy.

Avtokólikti tizgindegen 43 jastaǵy júrgizýshi men 43 jastaǵy jolaýshy Atyraý oblysynyń turǵyndary bolyp shyqty. Kúdiktiler ýaqytsha ustaý ızolıatoryna qamaldy.

Atalǵan derek boıynsha QR Qylmystyq kodeksiniń 296-baby 4-bóligimen sotqa deıingi tergep-tekserý áreketteri júrgizilýde. Tıisti saraptamalar taǵaıyndaldy», - dedi Aral aýdandyq polıtsııa bólimi tergeý bólimshesiniń aǵa tergeýshisi Jylqaıdar Otarov.