Qyzylorda oblysynda eki aýdanǵa jańa ákim taǵaıyndaldy

QYZYLORDA. QazAqparat - Qyzylorda oblysynyń eki aýdanyna jańa ákim taǵaıyndaldy, dep habarlaıdy QazAqparat tilshisi.

Oblys ákiminiń ókimimen jáne QR Prezıdenti Ákimshiligi jáne Syrdarııa aýdandyq máslıhatynyń kelisimderi boıynsha Syrdarııa aýdanynyń ákimi laýazymyna Rústemov Rýslan taǵaıyndaldy.

R. Rústemov 1968 jyly týǵan. ál-Farabı atyndaǵy Qazaq ulttyq ýnıversıtetin bitirgen. Eńbek jolyn Qyzylorda pedagogıkalyq ınstıtýtynda oqytýshy qyzmetinen bastaǵan. 1997-2002 jyldary – Qyzylorda qalasy ákiminiń apparatynda maman, konsýltant, Qyzylorda qalasy ákiminiń baspasóz hatshysy, Qyzylorda qalalyq mádenıet bóliminiń meńgerýshisi, Qyzylorda qalasy ákimi apparatynyń ishki saıasat jáne áleýmettik sala bóliminiń meńgerýshisi boldy. 2002-2008 jyldary – Qyzylorda oblysynyń mádenıet basqarmasy bastyǵynyń orynbasary, Qyzylorda oblysy ákimi apparatynyń áleýmettik-saıası bóliminiń meńgerýshisi, Shıeli aýdany ákimi apparatynyń basshysy, Shıeli aýdany ákiminiń orynbasary. 2010-2016 jyldary Qyzylorda oblysynyń tilderdi damytý basqarmasynyń basshysy bolsa, eki márte Qyzylorda oblystyq ishki saıasat basqarmasyn basqardy.Qyzylorda qalasy ákiminiń orynbasary, Jańaqorǵan aýdanynyń ákimi bolǵan.

2016 jyldyń tamyz aıynan bastap osy kezge deıin Qyzylorda oblysy ákiminiń orynbasary laýazymynda qyzmet atqaryp keldi.

Sondaı-aq, oblys ákiminiń ókimimen jáne QR Prezıdenti Ákimshiligi men Jańaqorǵan aýdandyq máslıhatynyń kelisimderi boıynsha Jańaqorǵan aýdanynyń ákimi laýazymyna Maqashov Sultan Ysqaquly taǵaıyndaldy.

S. Maqashov 1961 jyly týǵan. Qazaq hımııa-tehnologııalyq ınstıtýtyn jáne Qyzylorda ekonomıka, ekologııa jáne quqyq ýnıversıtetin bitirgen. Eńbek jolyn 1978 jyly Qazaly aýdany Jańaqazaly kommýnaldyq kásiporyndar kombınatynda slesar retinde bastaǵan. 1984-1992 jyldary – Qazaly aýdandyq №86 jyljymaly mehanıkalandyrylǵan kolonnada brıgadır, sheber, aǵa prorab bolsa, 1992-1995 jyldary – №2 azamattyq qurylys mekemesinde bas ınjener, №86 jyljymaly mehanıkalandyrylǵan kolonnanyń josparlaý bóliminiń bastyǵy qyzmetin atqardy. Al 1995-2015 jyldary Qazaly aýdany ákimi apparatynyń uıymdastyrý-ınspektorlyq bóliminiń bas ınspektory, Qazaly aýdanynyń bas sáýletshisi, Qyzylorda oblysy boıynsha jyljymaıtyn múlik ortalyǵy Qazaly fılıalynyń dırektory, Qazaly aýdany ákiminiń orynbasary qyzmetterinde boldy.

2015 jyldyń maýsym aıynan bastap osy kezge deıin Qarmaqshy aýdanynyń ákimi laýazymynda qyzmet atqaryp keldi.

Buǵan deıinQyzylorda oblysynda oblys ákiminiń orynbasary men oblys ákimi apparat basshysy taǵaıyndalǵan bolatyn .