Qyzylorda oblysynda egizder aýyly bar
QYZYLORDA. QazAqparat - Qyzylorda oblysy Qazaly aýdanyndaǵy Úrmash Túktibaev atyndaǵy aýyldy egizder aýyly dep ataıdy. Óıtkeni, eldimekende egizder jıi dúnıege keledi eken, dep habarlaıdy QazAqparat tilshisi.
Bul aýylda 1800-den astam adam turady, otbasylar sany 300-den asyp jyǵylady. Sońǵy shırek ǵasyrdan astam ýaqyttan beri munda onnan astam egiz jaryq dúnıe esigin ashqan.
Olardyń arasynda úlkeni sanalatyn Janarys jáne Bekarys Sapaevtar búginde otyz jasqa taıap qaldy. Egiz jigitter elimiz táýelsizdik alǵan jyldarda ómirge kelgen. Búginde bilim salasynda jemisti qyzmet atqaryp keledi. Sol jyly dúnıege kelgen Almat pen Samat ta elimizdiń órkendeýine óz úlesin qosyp júrgen jandar. Bul jigitter mýzykalyq bilim alyp, qazirgi tańda óner salasynda eńbek etýde.
Osyndaı egiz jigitter Aımaqovtar otbasynda da bar. Bul otbasyndaǵy Erjan Qostanaı oblysy Rýdnyı qalasyndaǵy pedagogıkalyq ınstıtýtta oqysa, Nurjan Astanada temirjol mamandyǵy boıynsha tálim alǵan. Olardyń nemere baýyrlary Edil men Jaıyq Abzaldar Qazaly kólik-tehnıkalyq kolledjinde mamandyq aldy.
Edil men Jaıyq Abzaldar ózderiniń egiz bolýyna baılanysty ártúrli qyzyqty oqıǵalardy bastan ótkergenin aıtýda. «Biz óte uqsaspyz. Dostarymyz is-áreketterimizdi syrttaı qadaǵalap júretinin ańǵaramyz. Uqsastyǵymyzdyń paıdasyn kóp kórdik», - deıdi olar.
Sondaı-aq, Kıikbaı Naǵyzálıev pen Aıymgúl Aldambergenovtiń otbasynda 1997 jyly Erqanat pen Nurqanat týǵan. Búginde jıyrma jastan asqan jigitter ata-anasynyń úmitin aqtaýǵa tyrysyp keledi. Bul otbasynda taǵy bir egiz bar. Qazir 13 jasqa kelgen Bekzat pen Saıat - ózderin jaqsy qyrynan tanytyp júrgen órender.
Bıyl18-ge tolǵan Nursultan men Sara da osy aýylda dúnıege kelgen.
2006 jyly aýylda taǵy eki egiz ata-analarynyń kóz qýanyshyna aınaldy. Atap aıtqanda, Aıdana men Aıbek Igenbergen, Erkemaı men Erketaı Asandar dúnıe esigin ashty.
Al 2010 jyly Tolǵanaı men Tolaǵaı Amanjol, 2012 jyly Aqtilek pen Aqnıet Jaqaıymdar aýyldyń, aǵaıynnyń qýanyshy boldy. Qazirgi kúni aýyldaǵy egizderdiń eń kishisi Marjan men Aıjan da shańyraqty shattyqqa toltyryp keledi.
Aýyldyń akýsher dárigeri Álııa Aıbergenniń aıtýynsha, aýylda jylyna 45-50 náreste ómirge keledi. Egizderdiń jıi týýyn qalypty jaǵdaı retinde baǵalaıtynyn aıtady. Barlyq náreste jaryq dúnıege deni saý kelgen.
Elimizde egizder jıi dúnıege keletin ózge de aýyldar bar. Olardyń biri - Qostanaı oblysy Sarykól aýylyndaǵy Tápil aýyly. Onda 28 egiz dúnıe esigin ashqan eken.
