Qyzylorda oblysynda tsıfrlyq tehnologııalar basqarmasy quryldy
Bul týraly oblys ákimi Qyrymbek Kósherbaev apparat májilisinde habarlady. Atalmysh is tsıfrlyq tehnologııalardy naryqtyq standarttarǵa sáıkes damytý maqsatynda qolǵa alynyp otyr.
Kezdesýdi ashqan oblys ákimi sońǵy jyldary aqparattyq-kommýnıkatsııalyq tehnologııalar óńir ekonomıkasynyń barlyq salalarynda qarqyndy damyp kele jatqanyn atap ótti.
«Kórsetiletin memlekettik qyzmetter sapasyn, tsıfrlandyrý jáne jobalyq basqarýdy arttyrý máseleleri memlekettik basqarý salasyndaǵy basym baǵyttardyń birine aınaldy. Sondyqtan, onyń qalyptasýy men odan ári damýy zamanaýı naryqtyq standartqa sáıkes bolýy úshin óz aldyna derbes memlekettik organ bolyp sanalatyn Qyzylorda oblysynyń tsıfrlyq tehnologııalar basqarmasyn qurdyq. Sonymen qatar, oblysymyzda tsıfrlandyrý jumystarynyń tıimdi júrýin úılestirý maqsatynda oblys ákiminiń tsıfrlandyrý máseleleri jónindegi keńesshisi laýazymyn engizý jóninde sheshim qabyldandy», - dedi aımaq basshysy.
Tsıfrlandyrý jónindegi oblys ákiminiń keńesshisi qyzmetine Aqmaral Álmenova taǵaıyndaldy.
Álmenova Aqmaral Baıjanqyzy 1989 jyly dúnıege kelgen. Qorqyt Ata atyndaǵy Qyzylorda memlekettik ýnıversıtetin «Aqparattyq júıeler», Novosıbırsk memlekettik ulttyq-zertteý ýnıversıtetiniń magıstratýrasyn «Informatıka jáne esepteý tehnıkasy», sondaı-aq Qazan federaldyq ýnıversıtetiniń aspırantýrasyn «Esepteý mashınalary, keshenderi men kompıýterlik júıelerdi matematıkalyq jáne baǵdarlamalyq qamtamasyz etý» mamandyqtary boıynsha bitirgen. Tehnıka ǵylymdarynyń kandıdaty. 2014 jyldan bastap osy kezge deıin Tatarstan Respýblıkasy Ǵylym akademııasynyń kishi ǵylymı qyzmetkeri laýazymynda qyzmet atqaryp keldi.
