Qyzylorda oblysynda bıyl 7 sport nysany paıdalanýǵa beriledi
QYZYLORDA. QazAqparat - Qyzylorda oblysynda bıyl 7 sport nysany paıdalanýǵa beriledi, dep habarlaıdy QazAqparat tilshisi.
Oblystyq dene shynyqtyrý jáne sport basqarmasynyń basshysy Oljas Akımov aıtýynsha, bıyl aımaqtyń 7 eldimekeninde, atap aıtqanda Janqoja batyr, Mádenıet, Aqjarma, Eńbekshi, Túgisken aýyldarynda jáne Sekseýil, Tóretam kentterinde zamanaýı úlgidegi sport keshenderi salynýda.
Elbasy Joldaýyna sáıkes 2020 jylǵa qaraı Qyzylordada sportpen turaqty shuǵyldanýshylardyń qataryn 30 paıyzǵa jetkizý josparlanýda. Bul mindet buqarany salaýatty ómir saltyn ustanýǵa úndep, sport nysandarynyń qataryn arttyrý arqyly júzege asýda. Sońǵy 3 jylda óńirde 9 sport kesheni paıdalanýǵa berilgen. Qyzylorda qalasynyń «Mereı» móltek aýdanynda memlekettik-jekeshelik seriktestik aıasynda dene shynyqtyrý-saýyqtyrý kesheni iske qosyldy. Munda 1 200 adamnyń 15 sport túrimen shuǵyldanýyna jaǵdaı jasalǵan.
Kóshedegi sporttyq qurylymdarǵa qoljetimdilikti arttyrý maqsatynda Ulttyq olımpıadalyq komıtetiniń qoldaýymen qaladaǵy ortalyq alań, Tasbóget, Mereı móltek aýdandary men M.Eralıeva mádenıet úıi aýlasynda 4 strıt vorkaýd alańyn salý josparlanǵan. Qazirgi tańda ortalyq alańdaǵy vorkaýd kesheni jumys istep tur.
Segiz aıdyń ishinde óńirde dene shynyqtyrý jáne sportpen júıeli túrde shuǵyldanýshylar qatary 26,4 paıyzǵa kóterilip, 203 594 adamǵa jetti. Buqaralyq sportty damytý úshin 133 eldi mekenge 270 sport nusqaýshysy bekitilip, dene shynyqtyrýmen turaqty aınalysatyn azamattar sany 41 myńnan asty.
Aıta ketý kerek, jyl basynan beri Qyzylorda oblysynyń sportshylary Qazaqstan chempıonattarynda - 563 medal jeńip alsa, Azııa, Álem chempıonattarynda - 53 medal ıelendi. Sondaı-aq, elimizdiń Ulttyq qurama komandasyna oblystan 420 sportshy endi.
