Qyzylorda oblysynda bıyl 28 nysannyń qurylysy júrgizilýde
Óńirde pandemııa shekteýlerine qaramastan sońǵy 2 jylda jergilikti turǵyndarǵa 1984 baspana berildi. Memlekettik baǵdarlamalar arqyly kópbalaly jáne áleýmettik az qamtylǵan otbasylar páterli boldy. Bıyl 1222 páter el ıgiligine aınalady dep kútilýde.
«Bıyl óńirde 28 nysannyń qurylysy júrgizilýde. Onyń ishinde 21 nysannyń qurylysy ótken jyldan ótpeli bolsa, 7-i jańadan salynady. Atap aıtqanda, bıyl 13 bilim berý, 7 densaýlyq saqtaý nysany boı kóteredi. Odan bólek 3 mádenıet nysany men «Bıznestiń jol kartasy-2020» baǵdarlamasy aıasynda 3 ǵımarat salý bastalady. Oǵan qosa sport jáne qoǵamdyq tártip salalarynda bir-bir nysan el ıgiligine aınalady», - dedi oblystyq qurylys, sáýlet jáne qala qurylysy basqarmasy basshysynyń mindetin atqarýshy Arnur Nurmaǵanbetov.
Jyl ishinde Qyzylorda, Baıqońyr qalalary men Shıeli aýdanynda 372 páterlik 10 arendalyq turǵyn úı paıdalanýǵa berilmek. Sondaı-aq, oblys ortalyǵynda 580 páterlik 12 kredıttik turǵyn úı men 270 páterlik 7 jeke kommertsııalyq qurylys salýshylardyń esebinen turǵyn úı salynady.
Búginde 55 áleýmettik nysan boıynsha jobalyq-smetalyq qujattama ázirlenýde. Strategııalyq josparlaý baǵytynda Jańaqorǵan kentindegi «Saıajaı-1» móltek aýdanynda 300 gektar jáne Baıqońyr qalasynda 430 gektar aýmaǵynda egjeı-tegjeıli josparlaý jobasy ázirlendi.
«Aýyl - el besigi» baǵdarlamasy aıasynda barlyǵy 13 nysan salynady.
Eske salsaq, Qyzylordada «Qaýipsizdikti qamtamasyz etýdegi servıstik tásil» jobasy júzege asyrylýda.
