Qyzylorda oblysynda bıyl 186 mlrd teńgeden astam ınvestıtsııa tartyldy

QYZYLORDA. QazAqparat - Qyzylorda oblysynda bıyl 186 mlrd teńgeden astam ınvestıtsııa tartyldy. Jyl basynan beri óńirde munaı óndirý kóleminiń tómendeýine qaramastan ken óndirý ónerkásibindegi ınvestıtsııa kólemi 62,2 mlrd teńgeni qurady, dep habarlaıdy QazAqparat tilshisi.

Indýstrııalandyrý baǵdarlamasy sheńberindegi jobalardyń júzege asyrylýy óńdeý ónerkásibine oń áserin tıgizip keledi. Nátıjesinde sala kórsetkishi 2,6 esege artyp otyr.

«Óńirdegi birqatar áleýmettik salalarǵa ınvestıtsııa tartý kólemi ulǵaıdy. Atap aıtqanda, tamaqtaný boıynsha qyzmet kórsetý 3, aqparat jáne baılanys 1,7, densaýlyq saqtaý salasy 1,2 esege ósti. 2023 jylǵa deıin oblystyń ekonomıkalyq damý jospary bekitilip, 404 jobany júzege asyrý kózdelýde. Sondaı-aq, «Qyzylorda oblysynyń ınvestıtsııalyq múmkindikteri» jobasy ázirlendi», - dedi basqarma basshysy Rınat Qaldybekuly.

Vedomstvo málimetinshe, óńirde «Atameken» kásipkerler palatasynyń shaǵyn nesıelik mekemesi jumysyn bastap, kásipkerlerge jyldyq ústemaqy 6 paıyzben berilýde. Budan bólek, «Bıznestiń jol kartasy 2025» baǵdarlamasy aıasynda 6 ınvestıtsııalyq jobaǵa ınjenerlik ınfraqurylym jetkizý máselesi pysyqtalǵan.

Eske salsaq, Qyzylordada tirekti eldi mekenderdi gazǵa qosý qarqyndy júrgizilýde.