Qyzylorda oblysynda bir aýyl kógildir otynǵa qosyldy

QYZYLORDA. QazAqparat - Qyzylorda oblysy Shıeli aýdanynyń Ybyraı Jaqaev aýylynda tabıǵı gaz júrgizildi, dep habarlaıdy QazAqparat.

Oblysy ákimi baspasóz qyzmetiniń habarlaýynsha, Shıeli aýdanynyń Y.Jaqaev jáne Bıdaıkól eldimekenderi kógildir otynǵa qosyldy. Qazirgi ýaqytta úılerge gaz júrgizý týraly kelisimshart jasalyp jatyr.

«Memleket basshysynyń qoldaýymen bastalǵan iri strategııalyq mańyzy bar - «Beıneý-Bozoı-Shymkent» magıstraldy gaz qubyry Syr eline sátti múmkindik berdi. Olaı deıtinim, oblys aýmaǵynan ótetin 846 shaqyrymdyq gaz qubyry Qyzylorda oblysyn gazdandyrýǵa jol ashty. Bul Aral, Qazaly, Shıeli, Jańaqorǵan aýdan ortalyqtaryn jáne ótken jyly Baıqońyr qalasyn gazdandyrýǵa múmkindik berdi. Mine, endi kent ortalyǵynan bólek aýyldyq eldimekenderdi de gazdandyrý jumystary júrgizilýde», - dedi oblys ákimi Qyrymbek Kósherbaev.

Ybyraı Jaqaev aýylynyń turǵyny Quralbek Áýelbekov alǵashqylardyń biri bolyp úıine gaz júrgizdi.

«Biz tabıǵı gaz júrgizilgenine qýanyshtymyz. Endi peshti qolmen jaǵyp, otyn satyp alýdyń qajeti joq. Sonymen qatar, úıdi gazben jylytý ár qys saıyn satyp alatyn kómirge qaraǵanda áldeqaıda tıimdi bolady. Qazirdiń ózinde úıimiz jylynyp, jaıly kórinedi»,  - deıdi Quralbektiń jubaıy Lázzat Pármenqulova.

Bıyl qalǵan 3 aýdan ortalyǵyna - Josaly, Tereńózek jáne Jalaǵash kenti kógildir otynǵa qosylsa, al 2019 jyly kentishilik gaz jelileriniń qurylysy bastalady.

Búginde oblys halqynyń 63%-y tabıǵı gazben qamtamasyz etildi, 2020 jylǵa qaraı 95-ke deıin jetkizý mindeti qoıylyp otyr.

Eske sala ketsek, Elbasynyń «Prezıdenttiń 5 áleýmettik bastamasy» atty baǵdarlamasynda eldi gazben qamtamasyz etýdi jalǵastyrýtapsyrylǵan bolatyn.