Qyzylorda oblysynda baıdarka men kanoeda esý bazasy salynýda
Kezdesý barysynda qala basshysy sala ardagerleri men sańlaqtardyń aımaq abyroıyn arttyrýdaǵy eseli eńbegin atap ótti. Sondaı-aq, el sportyna eńbegi sińgen jattyqtyrýshylar men baıraqty básekeden oljaly oralǵan oǵlandarǵa alǵysyn bildirdi.
Nurlybek Nálibaev bıyl qala sportshylarynyń halyqaralyq, respýblıkalyq dodalarda jetken jetistikterine toqtaldy. Oblys ortalyǵyndaǵy sport salasynyń áleýetin arttyrýǵa baǵyttalǵan jarqyn jobalardyń júzege asyrylyp jatqanyn aıtty. Búgingi kúni «Jumyspen qamtý jol kartasy» baǵdarlamasy aıasynda qala aýmaǵynda sport salasyna baılanysty 10 joba júzege asyrylýda. Onyń ishinde, oblystyq 4 sport mektebine aǵymdaǵy jóndeý, «Lokomotıv» stadıonynyń fýtbol alańyna qaıta jańǵyrtý sharalary qolǵa alynǵan. Oǵan qosa baıdarka men kanoeda esý bazasynyń qurylysy júrgizilýde. Atap óterligi, oblys ortalyǵynda 33 oıyn-sporttyq alańynyń qurylysy jasalyp jatyr.
Qyzylorda qalasyna qarasty Birqazan eldi mekeni, Aqsýat, Aqjarma, Qosshyńyraý aýyldyq okrýgterinde dene shynyqtyrý alańyn salýǵa qalalyq bıýdjetten qarjy bólinip, qurylys jumystary júrgizilýde. Aldaǵy ýaqytta Tasbóget kentinen dene shynyqtyrý-saýyqtyrý kesheni salynady. Búginde keshenniń joba-smetalyq qujattaryn ázirleý men memlekettik saraptamadan ótkizýge qarjy qaralǵan.
Basqosýda sóz alǵan QR eńbegi sińgen jattyqtyrýshy Vıacheslav Kım men sala ardageri Altynbek Jańabekov Syr sportyna kórsetilgen qoldaýdyń aıryqsha ekenin aıtyp, qala basshysyna alǵysyn bildirdi. Al jas sportshy Aıbar Qajymuqan qazaqtyń bas aqyny Abaı óleńinen úzindi oqydy.