Qyzylorda oblysynda basshylardyń kabıneti bekitilgen normadan asyp ketken
Osy maqsatta Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti oblystyq qarjy basqarmasy, oblystyq memlekettik múlik jáne jekeshelendirý departamentimen birlesip túgendeý sharalaryn júrgizdi. Osynyń nátıjesinde aımaqtaǵy 403 memlekettik organnyń ornalasqan alańdary anyqtaldy.
«Atalmysh maqsatta oblystyq, qalalyq jáne aýdandyq arnaıy jumysshy toptary quryldy. Túgendeý boıynsha memlekettik organdarda 13799 sharshy metr alań belgilengen normadan asyp ketken. Naqty aıtqanda, ortalyq memlekettik organdardyń oblystaǵy qurylymdyq bólimshelerinde 2766 sharshy metr alań artyq. Al jergilikti atqarýshy organdarda 11033 sharshy metrge normanyń saqtalmaýy belgili boldy», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń orynbasary Berikbol Baıqojaev.
Túgendeý sharalary barysynda mamandar kabınet alańdarynyń bekitilgen normatıvten asyp ketkendigin anyqtady. Atap aıtqanda, memlekettik organ basshylary kabınetteri - 2592, basshylardyń qabyldaý bólmeleri - 915, orynbasarlardyń kabınetteri- 1099, qyzmetkerlerdiń kabınetteri - 3660, ortaq qoldanystaǵy bólmelerdiń alańdary - 5260 sharshy metrge artyq bolǵan.
Endigi kezekte anyqtalǵan artyq alańdardy basqa mekemelerdiń paıdalanýyna berý, jeke jáne zańdy tulǵalarǵa jalǵa berý múmkindigin qarastyrý josparlanyp otyr. Artyq jáne bos turǵan alańdardy jalǵa berý berý arqyly bıýdjetke kiris túsirý kózdelýde.
