Qyzylorda oblysynda balyqtyń neden qyrylǵany belgili boldy

ARAL. QazAqparat - Balyq sharýashylyǵy komıteti Qyzylorda oblysy Aral aýdany Bógen aýyldyq okrýgine qarasty Qarashalań sý aıdynyna Syrdarııa ózeninen sý alatyn kanaldyń (Saǵynbaı kanaly, jergilikti halyq Kógish dep ataıdy) boıynda balyq shabaqtarynyń qyrylýy faktisin tekserdi, dep habarlaıdy QazAqparat.

Eske sala keteıik, biz buǵan deıin Qyzylorda oblysynda balyq qyrylǵanyn habarlaǵan bolatynbyz.

«Balyq shabaqtarynyń jappaı qyrylýyna baılanysty 19 aqpan kúni osyǵan deıin bekitilgen 2021-2023 jyldar aralyǵyndaǵy qys mezgilinde balyq sharýashylyǵy sý aıdyndarynda jáne (nemese) ýchaskelerinde balyqtardyń jappaı qyrylý qaterine jol bermeý jónindegi is-sharalar josparyna sáıkes, quzyrly organdarmen birge zerdeleý jumysyn júrgizdi. Jalpy kólemi boıynsha kanal uzyndyǵy - 1,2 km jýyq, eni - 16 m. Zertteý barysynda kanal boıynan birneshe oıyq oıylyp, balyq qyrylǵany (torta, taban, aqbalyq) anyqtaldy. Kanal boıyndaǵy qyrylǵan balyq shabaqtarynyń jalpy salmaǵy 975,2 kg, eń kishi uzyndyǵy -4,5 sm, eń úlkeni-10 sm. Zertteý júrgizý kúni sýdaǵy ottegi mólsheri 3,5 mg/dm³, temperatýrasy 2,5 ºS, ortasha tereńdigi 2,5 m quraǵan. Ǵylymı uıymnyń mamany óziniń aldyn ala tujyrymdamasynda otteginiń azdyǵy balyqtar tirshiligi úshin qolaısyz ekendigin bildirgen» dep málim etti komıtetten.

Sonymen qatar, Bógen aýyldyq okrýginiń veterınarııa pýnktiniń qyzmetkerleri balyqtyń jáne Qyzylorda oblysy boıynsha ekologııa departamentiniń qyzmetkerleri sý synamasyn alyp, saraptama júrgizip jatyr.

Onyń nátıjesi qosymsha jarııalanady.

Qazirgi tańda balyqtardyń tirshilik etý jaǵdaıyn jáne balyq resýrstaryn saqtap qalý maqsatynda jergilikti artqarýshy organdarmen oıyq jasaý (ottegi berý úshin) jumysy júrgizilip jatqanyn aıta ketý qajet.