Qyzylorda oblysynda balyqtardyń qyrylý jaǵdaıy tirkeldi

QYZYLORDA. QazAqparat - Qyzylorda oblysyndaǵy Qarashalań sý aıdynynda balyq shabaqtarynyń qyrylý oqıǵasy tirkeldi, dep habarlaıdy QazAqparat tilshisi.

Bul jóninde Balyq sharýashylyǵy komıtetiniń baspasóz qyzmeti málim etti.

«18 aqpanda saǵat 16.30 shamasynda Qyzylorda oblysy, Aral aýdany, Bógen aýyldyq okrýgine qarasty Qarashalań sý aıdynyna balyq shabaqtarynyń qyrylý oqıǵasy tirkeldi. Ol Syrdarııa ózeninen sý alatyn Saǵynbaı arnasynda ornalasqan. Ony jergilikti halyq Kógish dep ataıdy. Jedel túrde quzyrly organdardyń birlesip jumys jasaý algorıtmine sáıkes qajetti is-sharalar qolǵa alyndy», - dep málim etti Balyq sharýashylyǵy komıtetiniń baspasóz hatshysy Aslan Jeńisov.

Vedomstvo málimetinshe, bul baǵytta Aral-Syrdarııa oblysaralyq basseındik balyq sharýashylyǵy ınspektsııasy tarapynan arnaıy top qurylǵan. Mamandar oqıǵa bolǵan jerge attanǵan. Qosymsha aqparat keıin jarııalanady.