Qyzylorda oblysynda balalardyń jańa demalys lageri salynady
QYZYLORDA. QazAqparat- Qyzylorda oblysynyń Qarmaqshy aýdanynda balalar tynyǵatyn jańa lager boı kóteredi.
Bul týraly «QazAqparat» HAA tilshisi aýdandyq ákimdikke silteme jasap habarlady.
Osydan 10 jyl buryn Syrdarııanyń sýy tasyp, jaǵalaýdaǵy jalǵyz «Jasulan» lagerin shaıyp ketken edi. Sodan beri qarmaqshylyq oqýshylar demalý úshin kórshi aýdandarǵa nemese Kókshetaý men Almatydaǵy lagerlerge attandyrylady.
Deni mektep janyndaǵy úıirmelerge ǵana barady. Bul másele endi sheshimin tapty. Oblystyq bıýdjetten bólingen 1 mlrd 280 mln teńgege bir maýsymda myń oqýshyny qabyldaı alatyn jańa demalys orny salynbaq. Jańa lagerde oqýshylardyń bilimin arttyrýǵa arnalǵan Ulttyq biryńǵaı testke daıarlaý ortalyǵy da jumys jasaıtyn bolady.
«Lager jyl boıy jumys jasaıtyn bolady. Onda jazda ǵana emes, qys aılaryndaǵy demalys mezgilderinde mektepten tys, sabaqtan tys olımpıadalar ótkizilp turady», - deıdi aýdan ákimi Sultan Maqashov.
