Qyzylorda oblysynda balalar án aıtyp, kúı shertýden baq synasty
QYZYLORDA. QazAqparat - Qorqyttaı Uzan - abyzdyń kúıine kúmbirlete ún qosqan, Syrdyń dańqyn jyrmen shyǵarǵan qasıetti Qarmaqshy elinde «Qorqyttan qalǵan qońyr ún» atty oblystyq balalar shyǵarmashylyǵy baıqaýy ótti, dep habarlaıdy QazAqparat tilshisi.
«EKSPO-2017» halyqaralyq kórmesiniń ashylý saltanatyna oraı jáne qazaq halqynyń jyraýlyq, kúıshilik dástúrlerin halyq arasynda keńinen nasıhattaý, ata-salt dástúrin urpaq sanasyna sińirý, sonymen birge osy óner túrlerine balalardyń yntasyn oıatý jáne jas jetkinshekterdiń talaptaryna dem berý maqsatynda uıymdastyrylǵan baıqaýǵa qart Qarataý men aıdyndy Aral aımaǵynan 30 ónerpaz qatysyp, «Dástúrli án-jyr óneri» jáne «Dástúrli kúı óneri» janrlary boıynsha baqtaryn synady.
Esimderi elge belgili Maıra Sársenbaeva, Aıdos Rahmetov, Sholpan Bıimbetova, Aınýza Begimsalova syndy óner maıtalmandarymen qatar, aýdandyq maslıhat depýtaty Muhtar Ibraev syndy jastar janashyry qazylyq etken baıqaýda kúıshiler arasynda kishi topta І oryndy jalaǵashtyq Ańsaǵan Dildabekova jeńip alsa, ІІ jáne ІІІ oryndarǵa qyzylordalyqtar Aıakóz Mahmýtbek pen Áset Sabyrbaı jáne qarmaqshylyq Alına Jomartovalar kóterildi.
Al, eresekter tobynda qyzylordalyq Balnur Keńesbaı bas júlde ıegeri atansa, І oryndy qazalylyq Dáýlet Dosqalı, ІІ oryndy araldyq Áıteke Ábdimuratov, al júldeli ІІІ oryndy jalaǵashtyq Beket Ersultan men qarmaqshylyq Madııar Jasańbaevtar ıemdendi.
Sonymen qatar, dástúrli án-jyr óneri boıynsha baq synaǵan talapkerler arasynda qarmaqshylyq Merýert Uzaqbaeva bas júldeni jeńip alsa, І oryndy Aral qalasynan kelgen Shadııar Oktıabruly, júldeli ІІ oryndy qarmaqshylyq Shuǵyla Marhabatova, al ІІІ oryndy araldyq Nurbala Oktıabrova men qarmaqshylyq Dınara Shońbaevalar ózara bólisti.
Jeńimpazdar men júldegerler arnaıy dıplomdarmen jáne baǵaly syılyqtarmen marapattaldy. Sonymen birge, ózderiniń ónerlerimen kórermender kózaıymy atanǵan bir top ónerpaz alǵys hattarǵa ıe boldy.
Baıqaýdy aýdan ákiminiń qoldaýymen, mádenıet jáne tilderdi damytý bólimi, jáne aýdandyq Kósheneı Rústembekuly atyndaǵy «Jyraýlar úıi» uıymdastyrdy.
