Qyzylorda oblysynda aıaldamada úsh oqýshyny qarýmen jaralaǵan kúdiktiler ustaldy

QYZYLORDA. QazAqparat - Qyzylorda oblysynda asa aýyr qylmys jasaǵan kúdiktiler ustaldy, dep habarlaıdy QazAqparat oblystyq polıtsııa departamentine silteme jasap.

15 jeltoqsan keshki saǵat 18.00 shamasynda Qyzylorda oblysynyń Qarmaqshy aýdany Tóretam kentinde bir top azamattar janjaldasyp, qarý qoldanǵan.

Saldarynan aıaldamada turǵan úsh jasóspirim oqtyń ushqynynan jaraqat aldy.

Atalǵan derek Qazaqstan Respýblıkasy Qylmystyq kodeksiniń 24-babynyń 3-bóligi, 99-babynyń 3-bóligimen (adam óltirýge oqtalý) tirkelip, sotqa deıingi tergeý bastalǵan.

Jasóspirimder der kezinde aýrýhanaǵa jetkizilip, kómek kórsetilgen jáne olardyń bireýi sol kúni qaıtarylsa, qalǵan ekeýi dárigerlik baqylaýǵa alynǵan.

Qazirgi ýaqytta jasóspirimderdiń jaǵdaıy birqalypty.

Qylmys boıynsha polıtsııa qyzmetkerleriniń shuǵyl áreketteriniń nátıjesinde «izin sýytpaı» 8 kúdikti anyqtalyp ustaldy.

Budan bólek, keshendi jedel izdestirý is-sharalaryn júrgizý nátıjesinde, osy qylmysty atys qarýymen oryndaǵan negizgi kúdikti quryqtalyp, ol kinásin moıyndaǵan jáne odan qylmys quraly tárkilenip, aıǵaqty zat alyndy.

Qazaqstan Respýblıkasy Qylmystyq-protsestik kodeksiniń 128-babynyń (ustap alýdyń negizderi) talaptaryna sáıkes, ustalǵan 9 kúdikti qamaqqa alyndy.

Tıisti sot saraptamalary taǵaıyndaldy. Tergeý júrip jatyr.