Qyzylorda oblysynda avtobýstardyń qalaı soqtyǵysqany belgili boldy
QYZYLORDA. QazAqparat - Qyzylorda oblysynda eki avtobýstyń soqtyǵysýyna ne sebep bolǵany málim etildi. Bastapqy málimet boıynsha «Setra» avtobýsynyń júrgizýshisi joldyń qarsy betine shyǵyp ketken, dep habarlaıdy QazAqparat QR IDM baspasóz qyzmetine silteme jasap.
Jol apaty keshe 16 qarasha kúni saǵat 19:15-te Qarmaqshy aýdanynda «Samara-Shymkent» jolynyń Aqjar aýylyna jaqyn tusta boldy.
«Aldyn ala derek boıynsha, Setra avtobýsynyń júrgizýshisi rólge ıe bola almaı, joldyń qarsy betine shyǵyp ketip, reıstik Qyzylorda-Qarmaqshy baǵytymen ketip bara jatqan avtobýsqa soǵylǵan.
Qyzylorda-Josaly baǵytyna bara jatqan «Setra» avtobýsynda 38 adam, al Qyzylorda-Áıteke bı avtobýsynda 39 adam bolǵan», - delingen habarlamada.
Aıta keterligi, «BaýTLıK» JShS-na qarasty «Setra» avtobýsy Qyzylorda-Josaly-Áıteke bı (Áıteke bı - Qazaly aýdanyndaǵy kent) turaqty marshrýtyn oryndaıdy. Tehnıkalyq baıqaýdan 22 qazanda «Kyzylorda tehosmotr» JShS-da ótken.
Al, «Dostyq» JK qarasty «Setra» avtobýsy Qyzylorda-Josaly (Josaly - Qarmaqshy aýdanynyń ortalyǵy) turaqty marshrýtyn oryndaıdy, tehnıkalyq baıqaýdy 27 maýsymda «Dınamo» JShS-nda ótken.
Qyzylorda oblysynyń Qarmaqshy aýdanynda «Qazaly-Qyzylorda» men «Qyzylorda-Qarmaqshy» baǵytyndaǵy eki avtobýs soqtyǵysyp, eki adam qaza tapty. Qaıtys bolǵandardyń biri 1964 jyly dúnıege kelgen bolsa, ekinshisi 1997 jylǵy oblys turǵyny. 2011 jylǵy bala Qarmaqshy aýdandyq aýrýhanasy jansaqtaý bólimine jetkizilgenmen dárigerler onyń ómirin saqtap qala alǵan joq.
2 avtobýsta barlyǵy 86 adam bolǵan. Ártúrli dárejedegi jaraqat alǵan 43 jolaýshy Qarmaqshy aýdandyq aýrýhanasyna, 6 adam Jalaǵash aýdanynyń ortalyq aýrýhanasyna, 5 adam oblystyq medıtsına ortalyqqa jetkizilgen.
Oqıǵa ornyna 3 sanıtarlyq avıatsııa qyzmeti barǵan. Dárigerler 45 jolaýshyǵa alǵashqy medıtsınalyq qyzmet kórsetken. Olarǵa ambýlatorlyq em taǵaıyndaldy. Qazirgi tańda 29 aýrýhanada em qabyldasa, 49-y úıine qaıtarylǵan.
