Qyzylorda oblysynda Astanaǵa gaz tartýǵa múmkindik beretin kompressorlyq stantsııa iske qosyldy
QYZYLORDA. QazAqparat - Qyzylorda oblysynyń ákimi Qyrymbek Kósherbaev pen «QazMunaıGaz» UK AQ vıtse-prezıdenti Qaırat Sháripbaev jańa «Qaraózek» kompressorlyq stantsııasynyń saltanatty ashylý rásiminde boldy. Paıdalanýǵa berilgen stantsııa bolashaqta Astana qalasyn jáne elimizdiń soltústik óńirlerin gazdandyrýǵa múmkindik bermek. Bul týraly QazAqparat HAA tilshisi habarlady
-Eń mańyzdysy, «Qaraózek» stantsııasynyń qurylysy aldaǵy ýaqytta elordamyz Astana qalasyn jáne soltústik óńirlerdi gazdandyrý jumysyn esepke ala otyryp josparlanǵan. Bolashaqta elordaǵa gaz tartý jumystary qasıetti Syr eliniń jerinen bastaý alady. Elbasynyń qoldaýymen bastalǵan iri strategııalyq mańyzy bar "Beıneý-Bozoı-Shymkent" magıstraldy gaz qubyry Syr eline zor múmkindik berdi. Oblys aýmaǵynan ótetin 846 shaqyrymdyq gaz qubyry Qyzylorda oblysyn gazdandyrýǵa jol ashty. Bul Memleket basshysynyń bizge jasaǵan tikeleı qamqorlyǵy. Atalmysh stantsııanyń iske qosylýy gaz salasy qyzmetkerleriniń Astana kúnine jasaǵan syıy, - dedi oblys ákimi Qyrymbek Kósherbaev jańa kompressorlyq statsııany iske qosý saltanatynda sóılegen sózinde.
Jańa stantsııanyń múmkindigi «Beıneý-Bozoı-Shymkent» magıstraldyq gaz qubyrynyń ótkizgishtik qabiletin 10 mlrd. tekshe metrge deıin ulǵaıtýǵa múmkindik beredi. Gaz qubyrynyń jalpy uzyndyǵy - 1534 shaqyrym, onyń 180 shaqyrymy Qyzylorda oblysy aýmaǵynan ótedi. Jobanyń 1-shi kezeńinde Astana qalasy, Qaraǵandy oblysy jáne Aqmola oblysynyń ońtústik aýdandary gazdandyrylmaq.
Atap ótý kerek, Qyzylorda oblysy ákimdigi men "QazTransGaz Aımaq" Aktsıonerlik qoǵamy arasynda jasalǵan memorandýmǵa sáıkes 4 aýdannyń ortalyǵy (Aral, Áıteke bı, Shıeli, Jańaqorǵan) jáne Baıqońyr qalasyna avtomattandyrylǵan gaz taratý stantsııalary men ishki gaz qubyrlarynyń qurylystary júrgizildi. Buǵan jalpy somasy 23 mlrd. teńge qarjy bólindi.
«Qaraózek» kompressorlyq stantsııasy «Beıneý-Bozoı-Shymkent» magıstraldyq gaz qubyrynan 944 shaqyrym qashyqtyqta ornalasqan, osy jylǵy sáýirde Aqtóbe oblysynda paıdalanýǵa engizilgen «Bozoı» stantsııasymen qosarly jumysqa eseptelgen.
