Qyzylorda oblysynda Aral sharýalaryna shóp daıyndaýǵa arnaıy brıgadalar quryldy
Oblys ákimi Gúlshara Ábdiqalyqovanyń tóraǵalyǵymen ótken selektorlyq jıynda jáne mal azyǵyn daıyndaý máselesi talqylandy.
Oblystyq aýyl sharýashylyǵy basqarmasynyń basshysy Talǵat Dúısebaevtyń aıtýynsha, aldaǵy qysqy ýaqytqa tórt túlikke 942,4 myń tonna iri azyq qajet. Bıyl jońyshqa daqylynan 220,2 myń tonna ónim jınalady dep kútilip otyr. Al qalǵan 722,2 myń tonnasy tabıǵı shóppen jáne kúrish sabanymen tolyqtyrylmaq.
Atalǵan maqsatta barlyq aýdan men Qyzylorda qalasynda arnaıy shtabtar qurylǵan. Búginde shabyndyq jerlerdiń naqty kólemi aıqyndaldy. Qajetti jem-shóp qorymen qamtamasyz etý is-shara jospary bekitildi.
«Oblys eldi mekenderinde osy maqsatta 114 brıgada qurylǵan. Oǵan 170 aýyl sharýashylyq tehnıkasy men 823 adam kúshi jumyldyrylýda. Árbir eldi mekende aýyl sharýashylyǵymen aınalysatyn iri kásipkerlermen jem-shópti qoljetimdi baǵada satý úshin tıisti memorandým jasaldy. Qazir jappaı shóp orý naýqany bastaldy», - dedi basqarma basshysy.
Qýańshylyqqa ushyraǵan Aral aýdanyndaǵy atalǵan baǵytta atqarylyp jatqan jumystar jóninde onlaın rejımde baıandaǵan aýdan ákimi Serik Sermaǵambetov qysqy kezeńge 184,6 myń tonna shóp qajet ekenin atap ótti. Onyń 36,5 myń tonnasy aýdannyń shabyndyq jerinen daıyndalady. Al, jetispeıtin 148,1 myń tonnasy syrttan tasymaldaý josparlanyp otyr.
«Bul maqsatta jasaqtalǵan 5 brıgada quramyna 30 adam tartyldy. Olar Aqtóbe oblysynyń Yrǵyz aýdanynda shóp orý jumysyn bastap ketti. Odan bólek, Jalaǵash jáne Qarmaqshy aýdandarymen memorandým jasalǵan, ol iske 3 brıgada jumylady.
Sondaı-aq, 3 sharýashylyq «Azyq-túlik kelisimshart rorporatsııasy» UK» AQ arqyly 490 tonna arpa jemin satyp alýǵa kelisim shartqa qol qoıdy. Qazir atalǵan qajettiliktiń 125 tonnasy aýdanǵa jetkizildi. Qalǵany 1-2 kúnde vagondarǵa tıeledi», - dedi aýdan ákimi onlaın rejımde.
Oblys boıynsha Aral aýdanyndaǵy tórt túlikti jem-shóp qorymen qamtamasyz etýdiń is-shara jospary bekitilgen. Soǵan sáıkes árbir aýdanǵa Araldaǵy aýyldyq okrýgteri boıynsha bólinis jasaldy. Onda qajetti shóp kólemi naqtylandy.
Sondaı-aq, qýańshylyq jaǵdaıy Qazaly aýdanynyń keıbir aýyldarynda kórinis bergen. Aýdan ákimi Muhtar Orazbaev bul boıynsha mal azyǵy men mal sharýashylyǵy ónimderiniń baǵasyn turaqtandyrý jónindegi aýdandyq shtab qurylǵanyna toqtaldy. Osy maqsatta arnaıy is-sharalar jospary qabyldanǵan. Aýdanda qysqa ýaqytta tórt túlikke 142 myń tonna shóp jáne 28,6 myń tonna jem qajettiligi naqtylandy. Qajetti shóptiń 70,4%, al jemniń 10% óz kúshimen qamtamasyz etiledi, qalǵany syrttan tasymaldanady dep josparlanýda.
Selektorlyq jıyndy túıindegen oblys basshysy Qyzylorda qalasy men aýdan ákimdikterine jergilikti jerde aldaǵy qys maýsymyna qajetti jem-shópti tolyǵymen daıyndaýdy mindettedi. Quzyrly oryndar arqyly jemdik bıdaı, arpa jáne suly ónimderin satyp alýdy uıymdastyrý úshin aýdandardan arnaıy operator belgilenýi tıis. Shóp daıyndaý sharasyna jumyssyz júrgen jastardy jáne eńbekpen qamtý ortalyǵynda tirkelgen azamattardy tartý jolyn qarastyrýǵa nazar aýdarylady.
Aýdandardyń qajettiligine oraı memlekettik orman qory jerinen arnaıy shóp daıyndaıtyn aýmaqtar belgilenbek.
Eske salsaq, bıyl Qyzylorda oblysynda egisti sýmen qamtamasyz etýge arnalǵan keste qatań qadaǵalanady.
