Qyzylorda oblysynda aptap ystyqta jolda qalǵan 30 jolaýshy qutqaryldy

QYZYLORDA. QazAqparat - Qyzylorda oblysynda aptap ystyqta «Jezqazǵan-Qyzylorda» trassasynda aıdalada jolda qalyp qoıǵan 30 jolaýshy qutqaryldy, dep habarlaıdy QazAqparat tilshisi.

Jolaýshylar avtobýsy Nur-Sultan qalasynan Túrkistan oblysynyń Jetisaı qalasyna baǵyt alyp bara jatqan. Avtobýs «Jezqazǵan-Qyzylorda» trassasynda buzylyp, 30 adam jolda qalyp qoıdy.

«Bul jóninde tótenshe jaǵdaılar 112- qutqarý qyzmetine qońyraý tústi. Atalǵan shaqyrtý boıynsha Órt sóndirý qyzmetinen mamandar PAZ avtobýsymen oqıǵa ornyna jetti. Jolaýshylar arasynda Ózbekstan azamattary bar bolyp shyqty. Qalǵany jolaı kólikterge minip ketkeni anyqtaldy. Tótenshe jaǵdaılar salasynyń mamandary jolaýshylardyń qan qysymyn ólshep, alǵashqy medıtsınalyq kómek kórsetti. Olar Qyzylorda qalasyndaǵy avtovokzaldan ózge avtobýstarǵa minip ketti», - dep málim etti Qyzylorda oblystyq tótenshe jaǵdaılar departamentinen.