Qyzylorda oblysynda apatty jaǵdaıdaǵy densaýlyq nysandarynyń máselesi sheshilmek
QYZYLORDA. QazAqparat-Bıyl Qyzylorda oblysynda apatty jaǵdaıdaǵy densaýlyq saqtaý nysandarynyń máselesin sheshýge basymdyq beriledi.
Bul týraly oblys ákimi Qyrymbek Kósherbaev 15 aqpan kúni ótken halyqqa esep berý kezdesýinde málimdedi, dep habarlady QazAqparat HAA tilshisi.
2016 jyly oblysta 200 orynǵa laıyqtalǵan kópsalaly balalar aýrýhanasy men Qyzylorda qalasynyń, Aral, Jalaǵash, Syrdarııa, Jańaqorǵan jáne Shıeli aýdandarynyń eldi mekenderinde 11 dárigerlik ambýlatorııalar paıdalanýǵa berildi.
Osy kúnderi Qazaly aýdany Áıteke bı kentindegi 150 orynǵa laıyqtalǵan ortalyq aýdandyq aýrýhananyń qurylysy júrýde. Jańaqorǵan kentindegi 250 kelýshige arnalǵan emhananyń qurylys jumystary da jalǵasyn tabatyn bolady. Olar osy jyly aıaqtalady dep kútilýde.
Oblys ákiminiń aıtýynsha, bıyl densaýlyq saqtaý salasyndaǵy basty basymdyq apatty jaǵdaıdaǵy nysandar máselesiniń sheshilýi men olardyń materıaldyq-tehnıkalyq bazasynyń nyǵaıýyna berilip otyr.
«Bıyl apatty jaǵdaıdaǵy aýrýhananyń ornyna jańa Aral ortalyq aýrýhanasynyń (150 oryndyq) qurylysyn bastaımyz. Budan soń, Shıeli aýdandyq ortalyq aýrýhanasynyń da qurylysyn josparlap otyrmyz. 2016 jyldyń qańtarynda oblystyq onkologııalyq ortalyǵynda onkopatologııamen aýyratyn syrqattarǵa pallıatıvti kómek kórsetý maqsatynda alǵash ret hospıs bólimi ashyldy. Buryndary osyndaı aýrýǵa shaldyqqan naýqastar óz qasiretimen, problemasymen ońasha qalsa, búgingi medıtsına naýqastardy ómirge qaıta beıimdeý úshin barlyq kómegin jasaýda»,-dedi aımaq basshysy.
