Qyzylorda oblysynda alıment boıynsha bereshek 136 mln teńgege azaıǵan
Bul málimet oblys prokýrory Nurlan Bıjanovtyń tóraǵalyǵymen ótken alıment óndirý baǵytynda atqarylǵan jumystarǵa qatysty vedomstvoaralyq májiliste aıtyldy.
Jyl basynan beri oblysta 18 400 balaǵa qatysty alıment óndirý týraly 12 575 atqarýshylyq qujat boldy.
Onyń ishinde 446 balaǵa qatysty 308 qujat boıynsha 379,8 mln teńge bereshek eseptelgen. Qazir olardyń 1 025-i aıaqtalǵan.
Atap aıtqanda, 728 -i oryndaýsyz keri qaıtarylǵan, 213-i toqtatylǵan, 84-i tolyq oryndalǵan.
«Qazirgi ýaqytta 17 myń balaǵa qatysty 11 550 atqarýshylyq qujat qaldyqta, 291 balaǵa qatysty 208 qujat boıynsha 243,7 mln teńgege qaryz óndirilmeı otyr.
Soǵan qaramastan jyl basynan beri bereshek 136,1 mln teńgege azaıǵan. Onyń ishinde Qyzylorda qalasynda – 88, Baıqońyrda – 16, aýdandar boıynsha Qazalyda – 9,7, Aralda – 8,6, Qarmaqshyda – 2,4, Jalaǵashta – 12,1, Syrdarııada – 7,2, Shıelide – 7,1, Jańaqorǵanda – 6,8 mln teńgeni quraıdy», - dep málim etti oblystyq prokýratýradan.
Tekserý kezinde alıment óndirý týraly qaýlyny boryshkerdiń jumys ornyna ýaqytyly joldamaý, boryshkerdiń el aýmaǵynan shyǵýyn ýaqytsha shektemeý, boryshkerlerdi ákimshilik jaýapqa tartpaý, boryshkerdiń esepshottaryna jáne múlkine tyıym salmaý sııaqty 389 zańbuzýshylyq anyqtalǵan.
