Qyzylorda oblysynda agroónimderdiń eksporty arttyrylady
Aımaq ákimdiginiń baspasóz qyzmetinen málim etkendeı, sýarmaly jerler júıesin damytý, aýyl sharýashylyǵy ónimderin óndirý jáne eksporttaý máseleleri Qyzylorda oblysynyń 2022 jylǵa deıingi Keshendi damý josparyna engizildi.
«Atap aıtqanda, egis alqaptaryn ártaraptandyrý baǵytynda sýdy az qajet etetin maıly jáne mal azyqtyq daqyldarynyń alqabyn ulǵaıtý josparlanýda. ıAǵnı, maıly daqyldar alqabyn 8,5 myń gektardan 20 myń gektarǵa deıin, mal azyqtyq daqyldar alqaptary 60,7 myń gektardan 78,0 myń gektarǵa deıin artpaq. Bul óz kezeginde mal sharýashylyǵynyń damýyna úlesin tıgizetin bolady», - dep atap ótti Qýanyshbek Ysqaqov.
Sondaı-aq, aımaqta aýyl sharýashylyǵy ónimderi óndirisin damytýǵa baǵyttalǵan birneshe joba júzege asyrylatyn bolady. Olar - qyzanaq ósirý alańyn 3,0 myń ga deıin ulǵaıtý jáne qyzanaq kontsentratyn shyǵarý boıynsha óndirisin uıymdastyrý; Qyzylorda qalasynda qýaty 5 myń tonnalyq et kombınatynyń qurylysy; Qyzylorda oblysynda et baǵytyndaǵy zamanaýı qus fabrıkasynyń qurylys jobalary.
Budan basqa, ónimdiligi joǵary, sýdy az qajet etetin jáne naryqta suranysqa ıe daqyldar egý maqsatynda sýarmaly jerlerdiń kólemin jańa 80 myń gektar jerdi engizý arqyly 300 myń gektarǵa jetkizý josparlanýda.
Esterińizge sala keteıik, aǵymdaǵy jyldyń 7 aqpanynda Qaýipsizdik Keńesiniń otyrysynda Keńes Tóraǵasy Tuńǵysh Prezıdent - Elbasy Nursultan Nazarbaev Úkimettiń bastamasymen Qyzylorda oblysynyń 2019-2022 jyldarǵa arnalǵan áleýmettik-ekonomıkalyq damýynyń Keshendi josparyn ázirleýdi tapsyrǵan bolatyn. Qazirgi ýaqytta Keshendi jospar ázirlendi. Ol quny 219,7 mlrd teńge bolatyn 119 is-sharadan turady. Onyń 156,7 mlrd teńgesi respýblıkalyq bıýdjetten, 50,6 mlrd teńgesi jergilikti bıýdjetten, qalǵan 12,4 mlrd teńgesi basqa kózderden tartylmaq.
28 mamyr kúni QR Úkimetiniń otyrysynda Qyzylorda oblysynyń ákimi Qyrymbek Kósherbaev óńirdiń 2022 jylǵa deıingi áleýmettik-ekonomıkalyq damýynyń keshendi josparyn tanystyrdy.